अलिबाग : येथील जिल्हा सरकारी रुग्णालयात रुग्णांना भेटायला आलेल्या महिला पाय घसरुन पडल्याची घटना सोमवारी (६ जानेवारी) घडली. दोन्ही महिलांवर उपचार करण्यात येत आहेत. रुग्णालयातील कारभार अत्यंत ढिसाळ असल्याने रुग्णालयातील बाथरुमध्ये पाणी साचल्याने बाथरूम आणि बाजूची जागा निसरडी झाली आहे. त्यावरून या दोन्ही महिला घसरून पडल्या.
सोमवारी (६ जानेवारी) रुग्णालयात एक आजी आणि एक महिला दुसर्या मजल्यावरील विभागात रुग्णांना भेटण्यासाठी आल्या होत्या. त्यावेळी तेथील दोन वेगवेगळ्या बाथरूममध्ये पाणी साचले होते. त्या ठिकाणी पाणी साचल्याने ती जागा निसरडी झाल्याने त्यांचा पाय घसरला आणि त्या पडल्या. त्यांच्या पायाला फॅक्चर झाले असल्याचे मनसेचे शॅडो कॅबिनेट सदस्य देवव्रत पाटील यांनी सांगितले. हे प्रकरण समोर आणून त्यांनी रुग्णालयातील परिस्थिती दाखवली आहे.
हेही वाचा… Fish Producton : कोकणातील मासे कुणी खाल्ले, मत्स्य उत्पादनात महाघट
अपघात विभागातून पेशंट वॉर्डमध्ये नेण्यासाठी वापरल्या जाणार्या व्हिलचेअरची दूरवस्था झाली आहे. त्या दोन्ही चेअरला फूटरेस्ट नाही आणि त्यामुळे पेशंट बसल्यानंतर त्यांना पाय सांभाळणे अवघड होते, याकडेही देवव्रत पाटील यांनी लक्ष वेधले. दरम्यान, याबाबत अधिक माहिती जाणून घेण्यासाठी जिल्हा शल्यचिकित्सक डॉ. अंबादास देवमाने यांच्याशी संपर्क साधण्याचा प्रयत्न केला असता तो होऊ शकला नाही.
(Edited by Avinash Chandane)