शिंदे-फडणवीस सरकार आल्यापासून महाविकास आघाडीला धक्क्यावर धक्के मिळत आहेत. शिवसेना हे पक्षनाव आणि धनुष्यबाण हे निवडणूक चिन्ह मिळाल्याने मुख्यमंत्री एकनाथ शिंदे यांच्या पक्षाच्या आमदारांचा आत्मविश्वास एकीकडे दुणावलेला असताना, दुसरीकडे भाजप पक्षही त्यांच्या बरोबरीने वरचढ ठरताना दिसतोय. पक्षाचे नाव आणि चिन्ह हे दोन्ही गमावल्याने उद्धव ठाकरे यांच्या पक्षाच्या आमदारांमधला आत्मविश्वास आता हळुहळू डगमगू लागलाय, असं चित्र दिसतंय. याचीच प्रचिती शेकापच्या बालेकिल्ल्यात दिसून येत आहे.
शेकापचा बालेकिल्ला म्हणून ओळखल्या जाणाऱ्या रायगडमधून महाविकास आघाडीला आणखी एक मोठा धक्का देण्यात आलाय. पेण मतदारसंघातील शेकापचे माजी आमदार लवकरच भाजपात पक्ष प्रवेश करणार आहे. कोकण शिक्षक मतदारसंघाच्या निवडणुकीत भाजपचे ज्ञानेश्वर म्हात्रे यांनी शेकापच्या बाळाराम पाटील यांचा दारूण पराभव केला होता. या पराभवाच्या धक्क्यातून शेकाप आता कुठे सावरत पुन्हा आगामी निवडणूकीच्या मैदानात उभा राहण्याच्या तयारीत असताना भाजपनं शेकापला आणखी एक मोठा धक्का दिलाय.
पेण मतदार संघातील शेकापचे माजी आमदार धैर्यशील पाटील यांनी लाल बावट्याची साथ सोडली आहे. ते लवकरच भाजपात पक्ष प्रवेश करणार आहेत. राज्यातील विधानसभा निवडणुकीपूर्वी महाविकास आघाडीला आणखी कमजोर करण्यासाठी भाजपने प्रयत्न सुरू केले आहेत. यासाठी महाविकास आघाडीचे काही आमदार फोडण्याची भाजपाची योजना आहे. रायगडमधल्या पेण मतदारसंघात भाजपाला यश मिळालं आहे. आज दुपारी ३ वाजता मुंबईतील भाजप प्रदेश कार्यालय येथे हा पक्ष प्रवेश होणार आहे. उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे यांच्या उपस्थितीत हा पक्ष प्रवेश होणार आहे. यावेळी पेणचे आमदार रविशेठ पाटील, पनवेलचे आमदार प्रशांत ठाकूर हे सुद्धा उपस्थित राहणार असल्याचं सांगण्यात येत आहे.
यापूर्वी रायगडमधीलच पालीमधील राष्ट्रवादी कॉंग्रेसच्या गीता पालरेचा आणि अलिबागमधील शेकापचे दिलीप भोईर यांनी भाजपात पक्षप्रवेश केला होता. त्यानंतर आता पेणमधून धैर्यशील पाटील यांच्या भाजप पक्ष प्रवेशानंतर रायगडमधील लोकसभेसाठी धैर्यशाली पाटील यांना उमेदवारी मिळण्याबाबत चर्चा जोरात सुरूय.
