खोपोली: थरारक राज्यस्तरीय कुस्ती स्पर्धेत मुंबई विभागाची खेळाडू आणि कार्मेल कॉन्व्हेंट स्कूल खोपोलीची विद्यार्थिनी कु.क्षितिजा जगदिश मरागजे १४ वर्ष वयोगट आणि ३९ किलो वजनी गटात राज्यस्तरीय शालेय कुस्ती स्पर्धेत प्रथम क्रमांक पटकावून सुवर्ण पदकाची मानकरी ठरली. या यशामुळे क्षितिजाची राष्ट्रीय स्पर्धेसाठी निवड झाली आहे. तर मुंबई विभागाची कु. सई संजय शिर्के हिने १७ वर्ष वयोगट ४० किलो वजनी गटात रौप्यपदक मिळवून खोपोलीच्या शिरपेचात मानाचा तुरा रोवल्याने सर्वत्र कौतुक होत आहे.
क्रीडा व युवक सेवा संचालनालय महाराष्ट्र राज्य – पुणे यांच्या वतीने आयोजित केलेल्या राज्यस्तरीय शालेय कुस्ती स्पर्धा २०२२-२३ चे भव्य आयोजन जिल्हा क्रीडा परिषद व जिल्हा क्रीडा अधिकारी कार्यालय रायगड यांच्या वतीने खोपोली येथील नियोजित कुस्तीमहर्षी भाऊसाहेब कुंभार क्रीडा नगरी येथे करण्यात आले होते.
क्षितिजा आणि सई यांनी केलेल्या कामगिरीचे कौतुक कर्जत-खालापूरचे आमदार महेंद्र थोरवे, खालापूरचे तहसीलदार आयुब तांबोळी, जिल्हा क्रीडाधिकारी रवींद्र नाईक, खोपोली पोलीस स्टेशनचे वरिष्ठ पोलीस निरीक्षक शिरीष पवार, खालापूर तालुका कुस्तीगीर संघाचे अध्यक्ष डॉ सुनील पाटील, केटीएसपी चे अध्यक्ष संतोष जंगम,कार्यवाक किशोर पाटील, शिवछत्रपती पुरस्कार विजेते मारुती आडकर, टाटा स्टीलचे शशी भूषण,भावेश रावल, हरीओम इलेक्ट्रॉनिक्सचे महेश राठी, डॉ. रणजित मोहिते, कोयना समाजाचे अध्यक्ष पांडुरंग साळुंखे, विठ्ठल मोरे, एम.डी.चाळके, बळीराम शिंदे, जितेंद्र सकपाळ, उमेश कदम,दत्तात्रय सकपाळ, उद्योजक विक्रम पाटील, देवदूत गुरुनाथ साठेलकर, कार्मेल कॉन्व्हेंटच्या मुख्याध्यापिकानिर्मल मारिया, लिली पॉल, क्रीडा शिक्षक समीर शिंदे, जयश्री नेमाने आणि सर्व शिक्षक यांच्याकडून होत आहे. पार्ले बिस्कीटचे व्यवस्थापक चंद्रकांत कुलकर्णी, आर्यन्स फ्रेंड्स फाऊंडेशनचे अध्यक्ष प्रशांत साळुंखे, कार्याध्यक्ष महेंद्र सावंत, सुधीर मुसळे, प्रवीण सावंत, अनिल सावंत, प्रमोद सावंत,महेश पवार, हनीफ कर्जीकर, अमोल कदम यांनी विशेष कौतुक केले.
प्रथमच स्पर्धेत भाग घेत पटकावले सुवर्ण पदक
क्षितिजाचे वडील जगदिश मरागजे हे क्रीडा शिक्षक असून ते राष्ट्रीय धावपटू आहेत. तसेच काका दिनेश व सचिन हे देखील राष्ट्रीय खेळाडू आहेत. त्यामुळे तिला खेळाचे बाळकडू हे घरातूनच मिळाले आहे. क्षितिजाने प्रथमच राज्यस्तरीय शालेय स्पर्धेत भाग घेत सुवर्ण पदक जिंकण्याचा पराक्रम आपल्या नावावर केला आहे. या स्पर्धेत महाराष्ट्रातील मुंबई, पुणे, कोल्हापूर, नाशिक, औरंगाबाद, अमरावती, नागपूर,लातूर असे ८ विभाग आणि १ क्रीडा प्रबोधिनी मिळून १६१ अव्वल महिला कुस्तीगीरांनी आपल्या दर्जेदार खेळाचे प्रदर्शन केले.
