भारताची आघाडीची बॅडमिंटनपटू सायना नेहवालचे ऑल इंग्लंड स्पर्धेतील आव्हान उपांत्यपूर्व फेरीत संपुष्टात आले आहे. या फेरीत तिचा जागतिक क्रमवारीत अव्वल स्थानी असलेल्या तैवानच्या ताई झू यिंगने १५-२१, १९-२१ असा सरळ गेममध्ये पराभव केला. सायना आणि यिंगमध्ये आतापर्यंत २० सामने झाले आहेत. यापैकी आता १५ सामने यिंगने जिंकले आहेत, तर सायनाला अवघे ५ सामने जिंकता आले आहेत. सायनाला २०१३ पासून यिंग हरवता आलेले नाही.
उपांत्यपूर्व फेरीतील या सामन्याची सुरुवात ताई झू यिंगने अप्रतिमरीत्या केली. त्यामुळे पहिल्या गेमच्या मध्यांतराला तिच्याकडे ११-३ अशी मोठी आघाडी होती. मध्यांतरानंतर मात्र सायनाने दमदार पुनरागमन केले. तिने पुढील १२ पैकी ९ गुण जिंकत यिंगची आघाडी १२-१४ अशी कमी केली. पण, यिंगने पुन्हा एकदा आपला खेळ उंचावत २०-१३ अशी आघाडी मिळवली. सायनाने यापुढील २ गुण मिळवले. मात्र, पुढचा गुण यिंगने जिंकत पहिला गेम आपल्या नावे केला.
दुसर्‍या गेममध्ये सायना आपल्या खेळात सुधारणा करेल अशी अपेक्षा होती आणि तसेच झाले. तिने चांगली सुरुवात करत ८-३ अशी ५ गुणांची आघाडी मिळवली. मध्यांतरापर्यंत सायनाने ११-८ अशी आघाडी मिळवली होती. मात्र, मध्यांतरानंतर यिंगने आक्रमक फटके मारत १७-१५ अशी आघाडी घेतली. सायनाने पुनरागमन करत १९-१९ अशी बरोबरी केली होती. पुढे सायनाने मारलेले बॅकहँड फटक्यांचे दमदार प्रतिउत्तर देत यिंगने हा गेम २१-१९ असा जिंकत सायनाला स्पर्धेबाहेरचा रस्ता दाखवला.
