मुंबई बंदर, प्रदीप पोर्ट, कोचीन पोर्ट या संघांनी अखिल भारतीय मेजर पोर्ट व्हॉलीबॉल स्पर्धेची विजयी सुरुवात केली आहे. वडाळा येथे सुरू झालेल्या या स्पर्धेत ९ संघांनी सहभाग घेतला आहे.
मुंबईने ब गटात चेन्नई पोर्टचा २५-१३, २५-०६, २५-०९ असा सरळ सेटमध्ये पराभव करत पहिल्या साखळी विजयाची नोंद केली. या सामन्यात सुरुवातीपासूनच आपले वर्चस्व प्रस्थापित करत मुंबई बंदरने हा सामना सहजपणे जिंकला. याच गटात तुतीकोरिन पोर्टने मार्मागोवा पोर्टचा २५-०६, २५-११, २५-१२ असा सहज पराभव केला.
अ गटात प्रदीप पोर्टने वैजाख पोर्टला २५-१२, २५-२०, २५- १४ असे नमवले. या सामन्यात दुसर्या सेटमध्ये वैजाख पोर्टने प्रदीपला कडवी लढत दिली. मात्र, प्रदीपने योग्य वेळी आपला खेळ उंचावत हा सेट जिंकला. याच गटात कोचीन पोर्टने मंगलोर पोर्टला २५-१०, २५-१५, २५-१४ असे पराभूत करत आगेकूच केली. या स्पर्धेचे उदघाटन मुंबई बंदरचे चेअरमन संजय भाटिया यांच्या हस्ते झाले.
