सिंधूची फायनलमध्ये धडक, तर सायना पराभूत 

एशियन गेम्सच्या उपांत्य फेरीत पी. व्ही. सिंधूने जपानच्या अकाने यामागूची हिचा २१-१७, १५-२१, २१-१० असा पराभव करत स्पर्धेच्या अंतिम फेरीत प्रवेश केला. हा सामना सुरुवातीपासूनच अटीतटीचा झाला. या सामन्याच्या पहिल्या सेटची सुरूवात दोन्ही खेळाडूंनी चांगली केली. त्यामुळे या सेटच्या मध्यंतरापर्यंत सिंधूकडे ११-८ अशी आघाडी होती. पण मध्यंतरानंतर सिंधूने अधिक चांगला खेळ करत हा सामना २१-१७ असा जिंकला. तर दुसऱ्या सेटची सुरुवात पहिल्या सेटप्रमाणेच झाली. या सेटच्या मध्यंतरापर्यंत यामागूचीकडे ११-१० अशी एका गुणाची आघाडी होती. पण मध्यंतरानंतर यामागूचीने आक्रमक खेळ करत हा सेट १५-२१ असा जिंकला. तर तिसऱ्या आणि निर्णायक सेटमध्ये सिंधूने अप्रतिम खेळ केला. तिने जोरदार स्मॅशचे फटके मारत यामागूचीवर आक्रमण केले. सिंधूच्या फटाक्यांचे यामागूचीकडे काहीच उत्तर नव्हते. त्यामुळे सिंधूने हा सेट २१-१० अशा मोठ्या फरकाने जिंकत अंतिम फेरीत प्रवेश केला.

सायनाला चिनी ताइपेच्या ताई झू यिंगने २१-१७, २१-१४ असे पराभूत केल्याने तिला ब्रॉंझ पदकावर समाधान मानावे लागले. या सामन्यात सायनाला आपल्या लौकिकाला साजेसा खेळ करता आला नाही. तिने पहिल्या सेटची सुरुवात चांगली केली होती. पहिल्या सेटमध्ये सायना १५-१६ अशा अवघ्या एका गुणाने मागे होती. पण पुढे सायनचा खेळ खालावल्याने हा सामना २१-१७ असा गमावला. दुसऱ्या सेटच्या मध्यंतरापर्यंत सायना ११-१० अशी अवघ्या एका गुणाने मागे होती. पण त्यानंतर तिने चुका करायला सुरूवात केली. त्यामुळे तिने हा सामना २१-१४ असा गमावला. तिला ब्रॉंझ पदकावर समाधान मानावे लागले.