महिलांच्या अॅशेस मालिकेतील दुसर्या टी-२० सामन्यात ऑस्ट्रेलियाच्या संघाने इंग्लंडवर ७ विकेट राखून विजय मिळवला. या सामन्यात ऑस्ट्रेलियाची अष्टपैलू खेळाडू एलिस पेरीने १ विकेट घेतली आणि फलंदाजीत नाबाद ४७ धावांची खेळी केली. या कामगिरीमुळे तिने एक अनोखा विक्रम आपल्या नावे केला आहे. टी-२० आंतरराष्ट्रीय क्रिकेटमध्ये १००० धावा आणि १०० विकेट्स अशी दुहेरी कामगिरी करणारी ही पहिली क्रिकेटपटू ठरली आहे.
जगातील सर्वोत्तम महिला अष्टपैलू क्रिकेटपटू म्हणून ओळखल्या जाणार्या पेरीने गेल्या वर्षी टी-२० विश्वचषकादरम्यान इंग्लंडच्या नॅट स्किवरचा बळी घेत १०० विकेट्स पूर्ण केल्या होत्या. रविवारी झालेल्या इंग्लंडविरुद्धच्या सामन्यात पेरीने ४७ धावांची खेळी करत एक हजार धावांचा टप्पा पूर्ण केला. पेरीने आतापर्यंत टी-२० क्रिकेटमध्ये १०४ सामन्यांत १०३ विकेट्स घेतल्या आहेत, तर फलंदाजीत २९ च्या सरासरीने १००५ धावा केल्या आहेत.
१००० धावा आणि १०० विकेट्स मिळवणारी पहिली क्रिकेटपटू झाल्यानंतर ती म्हणाली, मी हा विक्रम केला याची मला कल्पना नव्हती. आम्ही पुरुषांइतकेच टी-२० क्रिकेट खेळतो. मी आता १०० हून अधिक सामने खेळले आहेत. त्यामुळेच कदाचित हा विक्रम मी करू शकले.