भारतात कोरोनाची चिंताजनक परिस्थिती आहे. कोरोनाबाधित रुग्णांच्या संख्येत झपाट्याने वाढ होत असल्याने आरोग्य यंत्रणेवर ताण आला आहे. ऑक्सिजन, बेड्स आणि लसी आदींचा तुटवडा भासत आहे. अगदी लोकप्रिय खेळाडूंनाही ऑक्सिजन सिलेंडर मिळणे अवघड झाले आहे. भारताचा माजी क्रिकेटपटू सुरेश रैनाला ऑक्सिजन सिलेंडरबाबत ट्विटरवरून विचारणा करावी लागली. ‘मला मेरठ येथे माझ्या मावशीसाठी त्वरित ऑक्सिजन सिलेंडरची आवश्यकता आहे. ती ६५ वर्षांची असून तिला फुफ्फसांच्या संसर्गाने ग्रासले आहे,’ असे रैना त्याच्या ट्विटमध्ये म्हणाला. तसेच त्याने उत्तर प्रदेशचे मुख्यमंत्री योगी आदित्यनाथ यांनाही त्याच्या ट्विटमध्ये टॅग केले. परंतु, त्याच्या या ट्विटला बॉलिवूड अभिनेता सोनू सूदने उत्तर दिले.
Urgent requirement of an oxygen cylinder in Meerut for my aunt.
Age – 65
Hospitalised with Sever lung infection.
Covid +
SPO2 without support 70
SPO2 with support 91Kindly help with any leads.@myogiadityanath
— Suresh Raina🇮🇳 (@ImRaina) May 6, 2021
ऑक्सिजन सिलेंडर तुझ्यापर्यंत पोहोचेल
‘मला आणखी माहिती पाठव. मी तुझ्यापर्यंत ऑक्सिजन सिलेंडर पाठवण्याची व्यवस्था करतो,’ असे सोनू त्याच्या पहिल्या ट्विटमध्ये म्हणाला. त्यानंतर त्याने आणखी एक ट्विट केले. ‘भावा…१० मिनिटात ऑक्सिजन सिलेंडर तुझ्यापर्यंत पोहोचेल,’ असे तो या दुसऱ्या ट्विटमध्ये म्हणाला. भारतामध्ये मागील वर्षीपासून कोरोनाने थैमान घातले आहे. अगदी सुरुवातीपासून सोनू लोकांना विविध प्रकारची मदत करत आहे.
Oxygen cylinder reaching in 10 mins bhai. ☑️@Karan_Gilhotra @SoodFoundation https://t.co/BQHCYZJYkV
— sonu sood (@SonuSood) May 6, 2021
सोनूची फाऊंडेशनच्या माध्यमातून मदत
त्याचे स्वतःचे फाऊंडेशनही आहे, ज्याच्या माध्यमातून तो कोरोना काळात लोकांची मदत करत आहे. आज रैनाला मदत करण्याआधी त्याने बंगळुरू येथील कोरोनाबाधित रुग्णांसाठी ऑक्सिजनची सोय करत त्यांचे जीव वाचवले होते. सोनू करत असलेल्या या कामाचे सोशल मीडिया आणि मीडियातून नेहमीच कौतुक होते.
