क्विंटन डी कॉकने केलेल्या अर्धशतकाच्या जोरावर मुंबई इंडियन्सने आयपीएलच्या सामन्यात राजस्थान रॉयल्सवर ७ विकेट राखून मात केली. हा मुंबईचा यंदा सहा सामन्यांत तिसरा विजय ठरला. दिल्लीच्या फिरोझ शहा कोटला मैदानावर झालेल्या या सामन्यात राजस्थानने मुंबईपुढे १७२ धावांचे आव्हान ठेवले होते. याचा पाठलाग करताना मुंबईचे सलामीवीर डी कॉक आणि कर्णधार रोहित शर्मा यांनी आक्रमक सुरुवात केली. या दोघांनी सहा षटकांत ४९ धावांची सलामी दिली. मात्र, रोहित (१४) आणि सूर्यकुमार यादव (१६) यांना क्रिस मॉरिसने झटपट बाद करत मुंबईला अडचणीत टाकण्याचा प्रयत्न केला. परंतु, डी कॉकने अप्रतिम फलंदाजी सुरु ठेवली. त्याला कृणाल पांड्या (३९) आणि पोलार्ड (नाबाद १६) यांची उत्तम साथ लाभल्याने मुंबईने हा सामना जिंकला. डी कॉकने ५० चेंडूत ६ चौकार आणि २ षटकारांच्या मदतीने नाबाद ७० धावांची खेळी केली.
All Over: @mipaltan begin their Delhi leg on a positive note with a comfortable 7-wicket win over #RR. @QuinnyDeKock69 scores an unbeaten 70 off 50 balls. https://t.co/jRroRFWVBm #MIvRR #VIVOIPL pic.twitter.com/cJmFH609FU
— IndianPremierLeague (@IPL) April 29, 2021
कर्णधार सॅमसनची फटकेबाजी
त्याआधी या सामन्यात मुंबईचा कर्णधार रोहितने नाणेफेक जिंकून प्रथम गोलंदाजी स्वीकारली होती. राजस्थानचे सलामीवीर जॉस बटलर (४१) आणि यशस्वी जैस्वाल (३२) यांनी सुरुवातीपासून आक्रमक फलंदाजी केली. परंतु, या दोघांना लेगस्पिनर राहुल चहरने माघारी पाठवले. यानंतर कर्णधार संजू सॅमसनने (४२) फटकेबाजी केली. त्याला शिवम दुबेची (३५) साथ लाभल्याने राजस्थानने २० षटकांत ४ बाद १७१ अशी धावसंख्या केली होती.