महेंद्रसिंग धोनी हा भारतीय क्रिकेटच्या इतिहासातील सर्वात यशस्वी कर्णधारच नाही, तर सर्वोत्तम यष्टीरक्षक-फलंदाज म्हणूनही ओळखला जातो. धोनीने २००४ मध्ये एकदिवसीय क्रिकेटमध्ये पदार्पण केले होते. मात्र, पहिल्या काही सामन्यांत तो चांगली कामगिरी करू शकला नव्हता. सातव्या क्रमांकावर फलंदाजीला येताना त्याने ०, १२, नाबाद ७ आणि ३ धावा केल्या होत्या. मात्र, पाचव्या एकदिवसीय सामन्यात त्याला तिसऱ्या क्रमांकावर बढती मिळाली आणि या संधीचा फायदा घेताना त्याने ५ एप्रिल २००५ रोजी म्हणजे आजच्याच दिवशी १६ वर्षांपूर्वी आंतरराष्ट्रीय कारकिर्दीतील पहिले शतक झळकावले. त्याने विखाखापट्टणम येथे झालेल्या या सामन्यात पाकिस्तानविरुद्ध १२३ चेंडूत १५ चौकार आणि ४ षटकारांच्या मदतीने १४८ धावांची खेळी केली.
🏏 148 runs off 123 balls
💥 15 fours, four sixes#OnThisDay in 2005, MS Dhoni slammed his maiden international century in an ODI.His 🔥 knock helped India post 356/9 against Pakistan, eventually winning the game by 58 runs! pic.twitter.com/n7B0ZhpEiB
— ICC (@ICC) April 5, 2021
द्रविडसोबत १४९ धावांची भागीदारी
या सामन्यात भारतीय संघाने नाणेफेक जिंकून प्रथम फलंदाजी स्वीकारली. भारताची १ बाद २६ अशी अवस्था होती. मात्र, धोनीने आधी विरेंद्र सेहवागच्या साथीने दुसऱ्या विकेटसाठी ९६ धावांची, तर चौथ्या विकेटसाठी राहुल द्रविडसोबत १४९ धावांची भागीदारी रचली. त्यामुळे भारताने ५० षटकांत ९ बाद ३५६ अशी धावसंख्या उभारली आणि याचा पाठलाग करताना पाकिस्तानला २९८ धावाच करता आल्या.
एकदिवसीय कारकिर्दीत १० शतके
धोनीचे हे आंतरराष्ट्रीय कारकिर्दीतील पहिलेच शतक ठरले. त्याने एकदिवसीय कारकिर्दीत एकूण ३५० सामने खेळले आणि त्यात त्याने १० शतकांच्या मदतीने १०,७७३ धावा फटकावल्या. तसेच त्याच्या नेतृत्वात भारताने २००७ टी-२० आणि २०११ एकदिवसीय असे दोन वर्ल्डकप जिंकले. त्यामुळे धोनी हा भारतीय क्रिकेटच्या इतिहासातील सर्वात यशस्वी कर्णधार मानला जातो. त्याने मागील वर्षी आंतरराष्ट्रीय क्रिकेटमधून निवृत्ती स्वीकारली.
