Korea Open : सायना नेहवाल उप-उपांत्यपूर्व फेरीत

भारताची आघाडीची बॅडमिंटनपटू सायना नेहवालने कोरिया ओपन स्पर्धेच्या उप-उपांत्यपूर्व फेरीत धडक मारली आहे. तिने पहिल्या फेरीतील सामन्यात कोरियाच्याच किम ह्यो मिनचा २१-१२, २१-११ असा सरळ सेटमध्ये पराभव केला. सायनाने आपला सामना जिंकल्याने भारताचीही या स्पर्धेतील आव्हान कायम राहिले आहे.

सायनाने या सामन्याची सुरुवात अप्रतिम केली. पहिल्या सेटमध्ये तिने आक्रमक खेळ दाखवत सुरुवातीलाच ६-२ अशी आघाडी मिळवली. तर मध्यंतरापर्यंत तिच्याकडे १२-३ अशी मोठी आघाडी होती. यानंतर किमने सामन्यात पुनरागमन करण्याचा प्रयत्न केला. मात्र इतकी मोठी आघाडी कमी करण्यात तिला अपयश आल्याने तिने हा सेट २१-१२ असा गमावला. तर दुसऱ्या सेटमध्येही सायनाने चांगली सुरूवात केली. सुरुवातीलाच तिने ५-२ अशी आघाडी मिळवली. यानंतर सायनाने अधिकच आक्रमक खेळ करत १८-१० अशी मोठी आघाडी मिळवली. अखेर तिने २१-११ असा हा सेट जिंकत सामनाही जिंकला.