वाराणसी येथे झालेल्या सब ज्युनियर राष्ट्रीय आणि आंतर राज्य अजिंक्यपद कॅरम स्पर्धेच्या १४ वर्षंखालील गटात महाराष्ट्राच्या आकांक्षा कदमने तामिळनाडूच्या आर. मोनिशाचा २१-०, १२-१० सहज असा पराभव करत विजेतेपदावर आपले नाव कोरले. तिसर्‍या क्रमांकासाठी झालेल्या लढतीत तामिळनाडूच्या एम. खाजिमाने तामिळनाडूच्याच एस. अस्वीकावर ९-३, ११-२१, २१-४ असा विजय संपादन केला. १४ वर्षांखालील मुलांच्या अंतिम सामन्यात तामिळनाडूच्या एन. मिथुनने उत्तर प्रदेशच्या मोईनुद्दीनचा १५-१, १४-१० असा सरळ सेटमध्ये पराभव करून विजयावर शिक्कामोर्तब केले.
सांघिक गटात महाराष्ट्राच्या मुलांनी बाजी मारली. महाराष्ट्राने अंतिम फेरीत तामिळनाडूचा २-१ असा पराभव केला. तिसर्‍या क्रमांकासाठी झालेल्या लढतीत उत्तर प्रदेशचा संघ विजयी ठरला. त्यांनी पाँडिचेरीचा ३-० असा सहज पराभव केला. मुलींच्या सांघिक गटाच्या अंतिम फेरीत मात्र तामिळनाडूच्या संघाने महाराष्ट्रावर २-१ अशी मात केली. याच गटाच्या तिसर्‍या क्रमांकासाठी झालेल्या लढतीमध्ये बिहारने उत्तर प्रदेशला २-१ असे पराभूत केले.
१२ वर्षांखालील कॅडेट मुलांच्या एकेरीच्या अंतिम सामन्यात तामिळनाडूच्या एस. नवीनकुमारने महाराष्ट्राच्या नीलांश चिपळूणकरचा ५-२०, २०-१९, २०-१८ असा पराभव करत विजेतेपद मिळवले, तर कॅडेट मुलींच्या एकेरी गटाच्या अंतिम सामन्यात तामिळनाडूच्या व्ही. मिथराने महाराष्ट्राच्या मधुरा देवळेवर १६-१०, १४-१२ असा सरळ सेटमध्ये विजय संपादन केला आणि या गटाचे विजेतेपद मिळविले. विजेत्यांना चषक व प्रमाणपत्रे देऊन गौरविण्यात आले.
