इंग्लंडविरुद्ध आगामी पाच सामन्यांच्या टी-२० मालिकेसाठी शनिवारी भारताच्या संघाची घोषणा झाली. मुंबईकर फलंदाज सूर्यकुमार यादवला अखेर संधी मिळाली आहे. आयपीएलमध्ये सातत्यपूर्ण कामगिरी केल्यानंतरही सूर्यकुमारची ऑस्ट्रेलियाविरुद्धच्या टी-२० मालिकेसाठी भारतीय संघात निवड झाली नव्हती. परंतु, आता त्याचा संघात समावेश करण्यात आला असून ईशान किशन आणि राहुल तेवतिया यांनाही संधी मिळाली आहे. भारत आणि इंग्लंड यांच्यातील पाच सामन्यांची टी-२० मालिका अहमदाबाद येथील सरदार पटेल स्टेडियममध्ये होणार असून या मालिकेला १२ मार्चपासून सुरुवात होणार आहे.
Virat Kohli (Capt), Rohit Sharma (vc), KL Rahul, Shikhar Dhawan, Shreyas Iyer, Suryakumar Yadav, Hardik, Rishabh Pant (wk), Ishan Kishan (wk), Y Chahal, Varun Chakravarthy, Axar Patel, W Sundar, R Tewatia, T Natarajan, Bhuvneshwar Kumar, Deepak Chahar, Navdeep, Shardul Thakur. https://t.co/KkunRWtwE6
— BCCI (@BCCI) February 20, 2021
संजू सॅमसन संघाबाहेर
भारताने यष्टीरक्षक-फलंदाज म्हणून लोकेश राहुलसह रिषभ पंत आणि ईशान किशन यांना पसंती दर्शवली असून संजू सॅमसनला मात्र संघाबाहेर करण्यात आले आहे. ऑस्ट्रेलियाविरुद्ध मागील टी-२० मालिकेत सॅमसनला चांगला खेळ करण्यात अपयश आले होते. तसेच गोलंदाजांमध्ये जसप्रीत बुमराहला विश्रांती देण्यात आली असून भुवनेश्वर कुमारचे संघात पुनरागमन झाले आहे.
भारतीय संघ : विराट कोहली (कर्णधार), रोहित शर्मा (उपकर्णधार), लोकेश राहुल, शिखर धवन, श्रेयस अय्यर, सूर्यकुमार यादव, हार्दिक पांड्या, रिषभ पंत (यष्टीरक्षक), ईशान किशन, युजवेंद्र चहल, वरुण चक्रवर्ती, अक्षर पटेल, वॉशिंग्टन सुंदर, राहुल तेवतिया, नटराजन, भुवनेश्वर कुमार, दीपक चहर, नवदीप सैनी, शार्दुल ठाकूर.