टोकियो ऑलिम्पिकमध्ये सोमवारचा दिवस भारतासाठी विसरण्याजोगा ठरत आहे. तलवारबाजीत भवानी देवी, टेनिसमध्ये सुमित नागल, तिरंदाजीत भारतीय पुरुष संघ यांच्यापाठोपाठ टेबल टेनिसमध्ये मनिका बात्रावरही स्पर्धेबाहेर होण्याची नामुष्की ओढवली. महिला एकेरीच्या तिसऱ्या फेरीत मनिकाला १० व्या सीडेड ऑस्ट्रियाच्या सोफिया पोल्कानोव्हाने ०-४ (८-११, २-११, ५-११, ७-११) असे पराभूत केले. पोल्कानोव्हाला पहिल्या दोन फेरीत बाय मिळाला होता, तर मनिकाने तिचे पहिल्या दोन्ही फेरीतील सामने जिंकले होते. परंतु, पोल्कानोव्हाविरुद्ध मनिकाला चांगला खेळ करता आला नाही.
ऑलिम्पिकमधील आव्हान संपुष्टात आले
महिला फेरीतील तिसऱ्या फेरीच्या या सामन्यात मनिकाने पहिल्या गेममध्ये पोल्कानोव्हाला झुंज दिली. परंतु, पोल्कानोव्हाने मोक्याच्या क्षणी तिचा खेळ उंचावत हा गेम जिंकला. यानंतर मनिकाचा खेळ खालावला. पोल्कानोव्हाने मात्र उत्कृष्ट खेळ सुरु ठेवत हा सामना ४-० असा मोठ्या फरकाने जिंकला. या पराभवामुळे मनिकाचे टोकियो ऑलिम्पिकमधील आव्हान संपुष्टात आले. तिला मिश्र दुहेरी शरथ कमलच्या साथीने खेळताना पहिल्याच फेरीत पराभवाचा सामना करावा लागला होता.
Manika Batra goes down to World No. 17 Sofia Polcanova 0-4 in 3rd round clash.
Only Sharath Kamal left in the fray now as far as Indian #TableTennis action is concerned. #Tokyo2020withIndia_AllSports pic.twitter.com/eBPfh7fEw9— India_AllSports (@India_AllSports) July 26, 2021
मनिकाची कौतुकास्पद कामगिरी
मनिकाने महिला एकेरीच्या पहिल्या दोन फेरीत कौतुकास्पद कामगिरी केली. पहिल्या फेरीत तिने ब्रिटनच्या टिन-टिन होचा ४-० असा पराभव केला होता. दुसऱ्या फेरीत जागतिक क्रमवारीत ६२ व्या स्थानी असलेल्या मनिकाने जागतिक क्रमवारीतील ३२ व्या स्थानावरील युक्रेनच्या मार्गारेटा पेसोत्सकाला पराभवाचा धक्का दिला होता. तिने हा सामना ४-३ (४-११, ४-११, ११-७, १२-१०, ८-११, ११-५, ११-७) अशा फरकाने जिंकला होता.
