भारताचा पाच वेळचा विश्वविजेता बुद्धिबळपटू विश्वनाथन आनंदला हरवणे भल्या-भल्या बुद्धिबळपटूंना जमत नाही. परंतु, झिरोधा (Zerodha) या आर्थिक सेवा देणाऱ्या कंपनीचा सहसंस्थापक निखिल कामतने विश्वनाथन आनंदला पराभूत करण्याचा पराक्रम केला होता. रविवारी आनंद आणि कामत यांच्यात बुद्धिबळाचा एक चॅरिटी सामना झाला. या सामन्यात कामतने आनंदला पराभवाचा धक्का दिला होता. परंतु, हा विजय मिळवण्यासाठी चीटिंग केल्याचे स्वतः कामतने मान्य केले. त्याने आनंदला पराभूत करण्यासाठी कॉम्प्युटरची मदत घेतल्याचे कामत ट्विट करून म्हणाला. त्यामुळे त्याचे Chess.com वरील अकाऊंट बंद करण्यात आले आहे. या वेबसाईटवर जगभरातील बुद्धिबळपटू एकमेकांविरुद्ध ऑनलाईन सामने खेळतात. परंतु, आता निखिल कामतवर बंदी घालण्यात आली आहे.
आनंद सरांचा पराभव करणे शक्य नाही
बुद्धिबळाच्या सामन्यात मी आनंद सरांचा पराभव केला, यावर काही लोकांचा खरेच विश्वास बसला आहे. परंतु, हे शक्य नाही. त्यांचा बुद्धिबळाच्या सामन्यात पराभव करणे, म्हणजे १०० मीटर शर्यतीत युसेन बोल्टचा पराभव करण्यासारखे आहे, असे निखिल कामत त्याच्या ट्विटमध्ये म्हणाला.
It is ridiculous that so many are thinking that I really beat Vishy sir in a chess game, that is almost like me waking up and winning a 100mt race with Usain Bolt. 😬 pic.twitter.com/UoazhNiAZV
— Nikhil Kamath (@nikhilkamathcio) June 14, 2021
तसेच मी आनंद सरांचा पराभव करण्यासाठी कॉम्प्युटरची आणि बुद्धिबळ या खेळातील तज्ज्ञ व्यक्तींची मदत घेतल्याचे कामत या ट्विटमध्ये म्हणाला. माझा हा सामना खेळून काही गोष्टी शिकण्याचा प्रयत्न होता. मी केवळ मजेसाठी आणि चॅरिटी म्हणून हा सामना खेळलो. परंतु, माझ्या कृत्यामुळे जो गोंधळ निर्माण झाला, त्यासाठी मी माफी मागतो, असेही त्याने या ट्विटमध्ये लिहिले.