ठाणे महापालिकेच्या छत्रपती शिवाजी महाराज रुग्णालयातील अधिष्ठातांसह सर्व डॉक्टरांची झाली चौकशी

 ठाणे महापालिकेच्या छत्रपती शिवाजी महाराज रुग्णालयातील मृत्यू प्रकरणी मुख्यमंत्री एकनाथ शिंदे यांच्या निर्देशाने नेमलेल्या समितीने सलग दुसऱ्या दिवशी कसून चौकशी केली.  यामध्ये रुग्णालयाच्या अधिष्ठातांसह डॉक्टरांचा समावेश आहे. याशिवाय समितीने काही महत्वाचे कागदपत्रे ही ताब्यात घेतली. यामध्ये शवविच्छेदनाचा ही समावेश आहे. तसेच रुग्णालयातील प्रत्येक वॉर्डात जाऊन रुग्णांना वेळेत उपचार मिळतात की नाही, याची देखील खातरजमा केली आहे.
मागील आठवड्यात गुरुवारी ५ जणांचा त्यानंतर शनिवारी रात्री ते रविवारी सकाळपर्यंत १८ रुग्णांचा मृत्यु झाला होता. त्यानंतर पुढील दोन दिवसात आणखी सहा रुग्णांचा मृत्यु झाला होता. त्यामुळे हे प्रकरण संपूर्ण राज्यभर गाजले आहे.

त्यानुसार मुख्यमंत्री एकनाथ शिंदे यांच्यासह अनेक राजकीय मंडळींनी याठिकाणी हजेरी लावून या प्रकरणाची चौकशी करण्याची मागणी केली होती. काहींनी तर या प्रकरणाची श्वेत पत्रिका काढण्याची मागणी केली आहे. दरम्यान मुख्यमंत्री शिंदे यांनी या प्रकरणाची चौकशी करण्यासाठी चौकशी समिती स्थापन केली आहे. त्यानुसार आरोग्य सेवा आयुक्त धीरज कुमार यांच्या अध्यक्षतेखाली या समितीच्या सदस्यांनी गुरुवारी महापालिका मुख्यालयात हजेरी लावली होती. त्यांनी त्याठिकाणी तीन तास चौकशी केल्यानंतर सांयकाळी सातच्या सुमारास कळवा रुग्णालयाकडे धाव घेतली. त्याठिकाणी रात्री ११ वाजेपर्यंत पाहणी आणि चौकशी केल्याची माहिती सूत्रांनी दिली.

या चौकशीत येथील मुख्य अधिष्ठता यांच्यासह रुग्णांवर उपचार करणाऱ्या सर्वच डॉक्टरांची कसुन तपासणी केली. या शिवाय प्रत्येक वॉर्डात जाऊन रुग्णांना वेळेत उपचार मिळतात की नाही, याची देखील खातरजमा केली आहे. तसेच रोज उपचारासाठी किती रुग्ण येतात, किती शस्त्रक्रिया होतात, शिवाय ज्या रुग्णांचा मृत्यु झाला त्यांची देखील माहिती घेतली गेली आहे. त्यातही त्यांचा मृत्यु नेमका कशामुळे झाली, याची माहिती देखील त्यांनी घेतली आहे. तसेच मृत पावलेला प्रत्येक रुग्ण केव्हा दाखल झाला होता, त्याच्यावर काय काय उपचार करण्यात आले, कोणती औषधे देण्यात आली याची देखील माहिती घेतली गेली आहे. गुरुवारी दुपारी ३ ते रात्री ११ वाजेपर्यंत झाडाझडती घेतली असून रुग्णासंदर्भातील महत्वाची कागदपत्रे देखील आपल्या ताब्यात घेतली आहेत. तसेच मृत्यू झालेल्या रुग्णांचे शवविच्छेदन अहवाल देखील ताब्यात घेतल्याची माहिती सुत्रांनी दिली. त्यानंतर शुक्रवारी देखील दुपारी दोन वाजता या समिती मधील सदस्यांनी कळवा रुग्णालयात हजेरी लावली होती. त्यावेळस काही शिल्लक कागदपत्रे देखील त्यांनी आपल्या ताब्यात घेतली असल्याचेही सुत्रांनी दिली.