पावसाळा जवळ येत आहे. अशातच खबरदारी म्हणून पावसाळा पूर्व कामांसाठी आणि महत्वाच्या व तातडीच्या देखभाल-दुरुस्तीसाठी डोंबिवलीतील काही भागांचा वीजपुरवठा मंगळवारी (११ मे) रोजी काही तासांसाठी बंद ठेवण्यात येणार आहे. याबद्दल पुर्वसुचना म्हणून वीज ग्राहकांच्या नोंदणीकृत मोबाईलवर यासंदर्भात संदेश पाठवण्यात आले आहेत.डोंबिवलीमध्ये जोशी हायस्कूल जवळचे तीन रोहित्र व या रोहित्रांवरील उच्च व लघुदाब वाहिन्या स्थलांतरित करावयाच्या आहेत. याशिवाय पावसाळ्यातील संभाव्य बिघाड टाळण्यासाठी वृक्षाच्या फांद्या छाटणे, वेली दूर करणे, रिजपरिंग, नटबोल्ट बदलणे, जीओडी मेंटेनन्स आदी देखभाल दुरुस्तीच्या कामांसाठी वीजपुरवठा बंद राहणार आहे.
त्यामुळे बाजीप्रभू उपकेंद्रांतर्गत कोपर रोड, शास्त्रीनगर, जुनी डोंबिवली भागात सकाळी ११ ते दुपारी २ तर ठाकुर्लीतील पीव्ही रोड, छेडा रोड, पेंडसेनगर, ९० फीट रोड, चोळेगाव, हनुमान मंदीर परिसर, ठाकुर्ली स्टेशन, विवेकानंद सोसायटी, पंचायत बावडी, बालाजीनगर, नेहरू रोड, फडके रोड, फते अली रोड, गणेश मंदीर व परिसर, सावरकर रोड भागात सकाळी १० ते सायंकाळी ४ वाजेपर्यंत वीजपुरवठा बंद राहील. गरिबाचा पाडा फिडरवरील महाराष्ट्रनगर, सरोवरनगर, सह्याद्रीनगर, मल्हारनगर, श्रीधर म्हात्रे चौक भागाचा सकाळी ९ ते दुपारी १२ तर काळूनगर फिडरवरील ठाकूरवाडी, काळूनगर, आनंदनगर व सम्राटनगरच्या काही भागाचा वीजपुरवठा दुपारी अडीच ते सायंकाळी साडेपाच दरम्यान बंद राहणार आहे. यासाठी सहकार्य करण्याचे आवाहन महावितरणने केले आहे.
