ठाणे । ठाणे रेल्वे स्थानकात पूर्व पश्चिम जोडणारे कल्याण आणि मुंबई दिशेकडील 2 नागरीक पादचारी पुलांचा लोकार्पण सोहळा खासदार राजन विचारे यांच्या हस्ते शुक्रवारी संपन्न झाला. मागील दोन ते तीन वर्षापासून रखडलेले पादचारी पूल खासदार राजन विचारे यांच्या पाठपुराव्यामुळे नागरिकांच्या सेवेत उपलब्ध झाले. या लोकार्पण सोहळ्यासाठी खासदार राजन विचारे, मध्य रेल्वेचे ए डी इ एन अल्लापुरे, सिनियर सेक्शन इंजिनियर बळीराम, ठाणे स्टेशन प्रबंधक केशव तावडे, सी सी आय मानवेंद्र सिंग, उप जिल्हाप्रमुख कृष्णकांत कोळी, शहर प्रमुख प्रदीप शिंदे, सचिव सुरेश मोहिते, संजीव कुलकर्णी, माजी नगरसेवक संजय दळवी तसेच पदाधिकारी, कार्यकर्ते मोठ्या संख्येने उपस्थित होते.
ठाणे रेल्वे स्थानकात दररोज सात ते आठ लाखांहून अधिक प्रवासी ये-जा करीत असताना ठाणे पूर्व व पश्चिम यांना जोडणारा ठाणे महापालिकेचा पादचारी पूल धोकादायक झाल्याने रेल्वेकडून 28 मे 2019 रोजी तोडण्यात आला होता.
तत्कालीन आयुक्त संजीव जयस्वाल असताना १३ नोव्हेंबर 2019 रोजी या दोन पुलाची मागणी खासदार राजन विचारे यांनी केली होती. त्यानंतर महापालिकेने ठाणे रेल्वे स्थानकातील कल्याण व मुंबई दिशेस नवीन पादचारी पूल व मुंब्रा येथील पादचारी पूल अशा एकूण तीन पुलासाठी महापालिकेने 24 कोटी निधी रेल्वेला देण्याचे मंजूर केले. त्यातील पहिल्या टप्प्यात 8 कोटी दुसर्या टप्प्यात 4 कोटी निधी रेल्वेकडे सुपूर्द केला होता. मात्र त्यानंतरही पुरेशा निधी अभावी या दोन्ही पुलांचे काम थांबले. खासदार राजन विचारे यांनी आवश्यक ५ कोटींचा निधी रेल्वेकडे वर्ग करावा, अशी मागणी खासदार राजन विचारे यांनी आयुक्त अभिजीत बांगर यांच्याकडे केली. अखेर आयुक्त अभिजीत बांगर यांनी याची दखल घेऊन ठाणे रेल्वे स्थानकातील पादचारी पुलासाठी 5 कोटीचा निधी 8 डिसेंबर 2023 रोजी रेल्वेकडे सुपूर्द केल्यानंतर खासदार राजन विचारे यांनी मध्य रेल्वेचे मुख्य प्रबंधक रजनीश गोयल यांच्याशी चर्चा करून 2 ते 3 वेळा मेगाब्लॉक घेऊन ठाणे रेल्वे स्थानकातील पुलाचे गर्डर रात्री स्वतः उपस्थित राहून टाकून घेतल्या त्यानंतर पुलाचे काम जलद गतीने मार्गी लावून पूल तयार झाला.
