कल्याण । कल्याण जिल्हा व सत्र न्यायालयाचे अतिरिक्त आणि सत्र न्यायाधीश आर. जी. वाघमारे यांच्या दिशेने शनिवारी दुपारी न्यायालयीन कामकाज सुरू असताना कटघर्यामधील आरोपीने किरकोळ कारणावरून पायातील चप्पल भिरकावली होती. तसेच, एक बंदुकधारी खासगी सुरक्षा रक्षक न्यायालय आवारात फिरत असल्याची एक दृश्य ध्वनीचित्रफित समाज माध्यमावर सामायिक झाली होती. या दोन्ही प्रकरणाची गंभीर दखल घेऊन पोलीस उपायुक्त अतुल झेंडे यांनी कर्तव्यात कसूर केल्याचा ठपका ठेवत न्यायालयीन कर्तव्यावरील अकरा पोलिसांना गुरुवारी सेवेतून निलंबित केले. त्यात एका पोलीस अधिकार्याचा समावेश आहे. या घटनेने पोलीस दलात खळबळ उडाली आहे. या दोन्ही घटना प्रकरणी महात्मा फुले पोलीस ठाण्यात गुन्हा दाखल आहे.
खडकपाडा पोलीस ठाण्यातील दाखल गुन्ह्यातील इसम किरण भरम यांना शनिवारी दुपारी कल्याण जिल्हा आणि सत्र न्यायालयात अतिरिक्त जिल्हा तसेच सत्र न्यायाधिश आर. जी. वाघमारे यांच्या समोर पोलिसांनी हजर केले होते. इसम किरण यांनी न्यायालयाला टेबल बदल करण्याची मागणी केली. न्यायालयाने किरण यांना तुम्ही तुमच्या वकिलामार्फत तसा अर्ज द्या, असे सांगितले. ही प्रक्रिया पूर्ण करण्यासाठी न्यायालयीन सेवकाने इसमाच्या वकिलाच्या नावाचा पुकारा करून हजर राहण्याचे सूचित केले. इसमाचा वकील न्यायालयात हजर झाला नाही. न्यायालयाने इसमास दुसरा वकील देण्याची सूचना केली आणि याप्रकरणी पुढील तारीख दिली. यावेळी इसमाने खाली वाकून पायातील चप्पल काढली. ती न्यायाधिश वाघमारे यांच्या दिशेने फेकली. पोलीस किंवा न्यायालयीन कर्मचार्यांना कळण्यापूर्वीच इसमाने ही कृती केली. चप्पल न्यायाधिशांच्या समोरील लाकडी मंचकाला लागून बाजुला बसलेल्या कर्मचार्याच्या समोर पडली. चप्पल फेकल्याच्या घटनेनंतर आरोपीच्या सोबत असलेले पोलीस काय करत होते? असा प्रश्न उपस्थित केला जात होता. महात्मा फुले पोलीस ठाण्यात किरण यांच्या विरुध्द पोलिसांना शासकीय कर्तव्य करण्यापासून परावृत्त केल्याचा गुन्हा दाखल करण्यात आला होता.
न्यायालयाच्या आवारात बंदुकधारी व्यक्ती
न्यायालयातील दुसर्या एका प्रकरणात न्यायालयीन कामासाठी आवारात आलेल्या एका व्यक्तीसोबत एक बंदूकधारी खासगी सुरक्षा रक्षक फिरत असल्याची दृश्यध्वनी चित्रफित समाज माध्यमांवर सामायिक झाली होती. न्यायालय आवारात शस्त्र घेऊन फिरण्यास प्रतिबंध असताना बंदुकधारी इसम न्यायालय आवारात आलाच कसा? असे प्रश्न वकिलांकडून उपस्थित करण्यात येत होते. याप्रकरणीही गुन्हा दाखल झाला होता.
या दोन्ही प्रकरणांची पोलीस उपायुक्त झेंडे यांच्या आदेशावरून चौकशी करण्यात आली. या चौकशीत न्यायालयीन कर्तव्यावर असलेले पोलीस कर्तव्यात कसूरपणा, निष्काळजी करत असल्याचे स्पष्ट झाल्याने उपायुक्त झेंडे यांनी एकूण ११ पोलिसांना गुरुवारी निलंबित केले.
न्यायालयीन आवारात कर्तव्यावर असलेले पोलीस कर्तव्यात कसूरपणा करत असल्याचे प्रथमदर्शनी स्पष्ट झाले. याप्रकरणी ११ पोलिसांवर निलंबनाची कारवाई करण्यात आली.
– अतुल झेंडे, पोलीस उपायुक्त परिमंडळ तीन, कल्याण
