HomeठाणेKalyan : कल्याण-डोंबिवलीत हुल्लडबाज दुचाकीस्वारांवर कारवाई 

Kalyan : कल्याण-डोंबिवलीत हुल्लडबाज दुचाकीस्वारांवर कारवाई 

Subscribe

या वेगवान दुचाकी रस्त्याने फिरवत असताना दुचाकी स्वार वाहनातील तांत्रिकतेचा गैरफायदा घेत वाहनातून विविध प्रकारचे जोराचे आवाज काढतात. रात्रीच्या वेळेत हे प्रकार घडत असल्याने शांततेचा भंग होतो. नागरिकांची झोप मोड होते. लहान बाळ, वृध्द, हदयरोगी यांना या मोठ्या आवाजाचा सर्वाधिक त्रास होतो.

कल्याण । कल्याण, डोंबिवली शहरांच्या विविध भागात अति वेगाने दुचाकी चालविणार्‍या, दुचाकीवर तीन ते चार जण बसून प्रवास करणार्‍या १५० हून अधिक तरुणांवर गेल्या दोन दिवसात पोलिसांनी रात्रीच्या वेळेत दंडात्मक कारवाई केली. या कारवाईचा दुचाकीस्वारांनी धसका घेतला आहे. रात्री दहा वाजल्यानंतर ते मध्यरात्रीच्या वेळेत काही तरुण दुचाकी स्वार आपल्या महागड्या, स्पोर्ट्स, अति वेगाच्या दुचाकी रस्त्यावर काढून कल्याण, डोंबिवली शहरांच्या विविध भागात विशेष करून ठाकुर्लीतील ९० फुटी रस्ता, कल्याण पूर्वेतील १०० फुटी रस्ता, कल्याण पूर्व पुना जोड रस्ता, गांधारे पूल ते पडघा रस्ता, टिटवाळा ते वाडेघर बाह्यवळण रस्ता, मोठागाव माणकोली रस्ता, फडके रस्ता भागात सुसाट वेगाने आपल्या दुचाकी चालवितात. ही वाहने चालविताना धडकी भरेल असे आवाज दुचाकीतून येत असतात.

या वेगवान दुचाकी रस्त्याने फिरवत असताना दुचाकी स्वार वाहनातील तांत्रिकतेचा गैरफायदा घेत वाहनातून विविध प्रकारचे जोराचे आवाज काढतात. रात्रीच्या वेळेत हे प्रकार घडत असल्याने शांततेचा भंग होतो. नागरिकांची झोप मोड होते. लहान बाळ, वृध्द, हदयरोगी यांना या मोठ्या आवाजाचा सर्वाधिक त्रास होतो. संबंधित रस्ते भागातील नागरिक या रोजच्या आवाजाने त्रस्त आहेत. कल्याण, डोंबिवली शहरात रात्रीच्या वेळेत अति वेगवान दुचाकी स्वारांचा उपद्रव असल्याने पोलीस उपायुक्त अतुल झेंडे यांनी अशा वाहन चालकांवर करडी नजर ठेवण्याचे आदेश स्थानिक पोलीस ठाण्यांना दिले आहेत. गेल्या दोन दिवसांच्या कालावधीत स्थानिक पोलिसांनी शहराच्या विविध भागात रात्रीच्या वेळेत अति वेगाने दुचाकी चालविणार्‍या १५० तरुण चालकांवर कारवाई केली अशा चालकांना पकडून पहिले १०० उठाबशा काढण्याची आणि त्यानंतर दंडात्मक कारवाई केली जाते. या कारवाईनंतर पुन्हा दुचाकी स्वार असे कृत्य करताना आढळला तर त्याला फौजदारी कारवाई करण्याची तंबी दिली जाते. काही जण एका दुचाकीवर तीन ते चार जण बसून हातवारे करत, मोठ्याने गाणी बोलत रात्रीच्या वेळेत शहराच्या येरझर्‍या मारतात. अशा दुचाकी स्वारांवर पोलिसांनी कारवाई सुरू केली आहे. अशाप्रकारचे मौज करणारे बहुतांशी तरुण अल्पवयीन असल्याचे पोलिसांना आढळले आहे. अशा मुलांच्या पालकांना पोलीस ठाण्यात बोलावून समज दिली जात आहे.

नशेखोरांवर कारवाई
रविवारी रात्री कल्याण, डोंबिवली शहराच्या विविध भागात पोलिसांनी झाडे, झुडपांचा आधार घेऊन मद्य, गांजा, इतर अंमली पदार्थांची तस्कारी आणि सेवन करणार्‍या सुमारे ६० ते ७० जणांवर कारवाई केली. कल्याण पूर्व, पश्चिम रेल्वे स्थानक परिसर हा अंमली पदार्थ विक्री आणि गांजा सेवन करणार्‍यांचा अड्डा बनला होता. या भागात स्थानिक पोलिसांनी दररोज कारवाई सुरू केली आहे.