वरिष्ठांच्या त्रासाला कंटाळून कल्याणमध्ये लोको पायलटची आत्महत्या

मध्य रेल्वेच्या सेवेतील साहाय्यक लोको पायलट सुजीत कुमार जयंत (४८) यांनी त्यांच्या कल्याण पूर्वेतील कोळसेवाडी भागातील राहत्या घरात आत्महत्या केल्याचा प्रकार रविवारी उघडकीला आला. वरिष्ठांकडून होत असलेल्या मानसिक त्रासाला कंटाळून सुजित यांनी आत्महत्या केल्याचा आरोप त्यांच्या सहकाऱ्यांनी केला आहे. सुजीत हे मुळचे उत्तरप्रदेशातील रहिवासी आहेत. त्यांचे कुटुंब मूळ गावी आहे. सुजीत राहत असलेल्या घराचा दरवाजा तीन दिवसांपासून उघडला जात नव्हता. शेजाऱ्यांना संशय आल्याने त्यांनी पोलिसांना ही माहिती दिली. त्यानंतर हा आत्महत्येचा प्रकार उघडकीला आला. लोको पायलट सुजीत जयंत यांनी आत्महत्या केल्याचे समजाच मध्य रेल्वे मार्गावरील बहुतांशी लोको पायलट रविवारी दुपारी कल्याण पूर्वेतील लोको पायलट कार्यालय, रेल्वे सुरक्षा दलाच्या कार्यालयासमोर जमा झाले. घडल्या प्रकाराबद्दल तीव्र नाराजी व्यक्त करत सुजित यांच्या सहकाऱ्यांनी या घटनेला जबाबदार अधिकाऱ्यांवर कारवाई करण्याची मागणी केली.

सुजीत जयंत यांच्या सहकाऱ्यांनी सांगितले, रेल्वे अंतर्गत विविध प्रकारच्या परीक्षा देऊन आम्ही पदोन्नत्ती प्राप्त करतो. अशाच प्रकारच्या कसोटी परीक्षा सुजीत यांनी देऊन ते खात्यांतर्गत त्यांचे पुढील टप्पे यशस्वीपणे गाठत होते. आकसापोटी सुजीत यांना मागील तीन महिन्यांपासून गैरहजर दाखविण्यात येत होते. चौथा महिना आला तरी त्यांना कामावर हजर करुन घेतले जात नव्हते. त्यांचे तीन महिन्याचे वेतन रोखण्यात आले होते. त्यामुळे घरभाडे, कुटुंब चालविण्याचा प्रश्न त्यांच्या समोर निर्माण झाला होता. वरिष्ठांकडून कोणतेही सहकार्य न मिळता अडवणुकीची भूमिका घेण्यात येत असल्याने सुजित मानसिक दृष्ट्या त्रस्त होते. सर्व वरिष्ठांना सुजीतला होणाऱ्या त्रासाची माहिती होती. तीन महिने वेतन न मिळाल्याने सुजीत यांची आर्थिक कोंडी झाली होती. आम्ही सहकारी काही रक्कम सुजीत यांना त्यांचा दैनंदिन, मासिक खर्च भागविण्यासाठी देत होतो, अशी माहिती सुजीत यांच्या सहकारी मित्रांनी दिली. सुजीत यांच्या मृत्युला जबाबदार असणाऱ्या वरिष्ठांविरुध्द कारवाई झाली पाहिजे, या मागणीसाठी सर्व लोको पायलटनी रविवारी कल्याण पूर्व रेल्वे स्थानका जवळील रेल्वे सुरक्ष बळाच्या कार्यालया समोर निदर्शने केली. लोका पायलटनी आक्रमक पवित्रा घेतल्याने आंदोलनाच्या भीतीने लोहमार्ग पोलिसांचा बंदोबस्त वाढविण्यात आला होता.