येत्या ३० मार्चला होणाऱ्या ठाणे मध्यवर्ती सहकारी बँकेची निवडणूक महाविकास आघाडी एकत्रित लढविणार असल्याची माहिती रविवारी ठाण्यात झालेल्या पत्रकार परिषदेत राज्याचे नगरविकास मंत्री तथा ठाण्याचे पालकमंत्री एकनाथ शिंदे आणि राष्ट्रवादी काँग्रेसचे नेते तथा गृहनिर्माण मंत्री डॉ. जितेंद्र आव्हाड यांनी दिली. रविवारी ठाण्याच्या टीपटॉप प्लाझा येथे आढावा बैठक घेण्यात आली. या बैठकीमध्ये नगरविकास मंत्री तथा पालकमंत्री एकनाथ शिंदे, गृहनिर्माण मंत्री डॉ. जितेंद्र आव्हाड आणि काँग्रेसचे प्रदेश उपाध्यक्ष तथा ठाणे- पालघर प्रभारी राजेश शर्मा यांनी मार्गदर्शन केले. यावेळी या निवडणुकीची जबाबदारी आर.सी. पाटील आणि गोपाळ लांडगे यांच्या खांद्यावर सोपविण्यात आली.
एकनाथ शिंदे यांनी यावेळी सांगितले की, या आधी ही निवडणूक कधी गांभीर्याने घेतली नव्हती. मात्र, आता महाविकास आघाडी एकत्रितपणे ही निवडणूक लढविणार आहे. उमेदवार निवडीपासून महाविकास आघाडी एकत्रित काम करणार असून ही निवडणूक आम्हाला अवघड नाही. डॉ. जितेंद्र आव्हाड यांनी सांगितले की, टीडीसीची निवडणूक लढवून आपल्या विचारांची एक संस्था ताब्यात घेऊन त्याद्वारे रोजगार निर्मिती करण्याचा आपला उद्देश आहे. त्यासाठी तिन्ही पक्ष एकत्र आले आहेत. जर कार्यकर्त्यांनी एकत्र यायचे ठरविले तर त्यासाठी मेहनत करायला आम्ही तिन्ही पक्षांचे नेते सज्ज आहोत. सध्या ठाणे जिल्ह्यात महाविकास आघाडीचे सर्वाधिक नगरसेवक आहेत. त्यामुळे ही निवडणूक सूप सोपी आहे.
पत्रकारांशी बोलताना डॉ. जितेंद्र आव्हाड यांनी, ही सहकाराची निवडणूक आहे. सहकार अडचणीत आल्यावर सरकारने मदत करायची असते. गेले अनेक वर्षे आम्ही हेच करीत आलेलो आहोत. म्हणून सहकार क्षेत्र जीवंत ठेवण्यासाठी आम्ही एकत्र निवडणूक लढविणार आहोत. त्यामध्ये कोणताही वैयक्तीक स्वार्थ नाही.” जागा वाटपाबद्दल विचारले असता, ही पहिलीच आढावा बैठक आहे. लवकरच जागा वाटपाबाबत निर्णय घेण्यात येईल, असेही त्यांनी सांगितले.
यावेळी, काँग्रेसचे प्रदेश उपाध्यक्ष तथा ठाणे पालघर प्रभारी राजेश शर्मा, आमदार रवींद्र फाटक, शांताराम मोरे, जगन्नाथ शिंदे, ज्योती कलानी, राष्ट्रवादीचे ठाणे शहराध्यक्ष तथा ठाणे- पालघर समन्वयक आनंद परांजपे, महापौर नरेश म्हस्के, जि.प,चे उपाध्यक्ष सुभाष पवार, शिवसेनेचे प्रकाश पाटील काँग्रेसचे ठाणे अध्यक्ष विक्रांत चव्हाण, नगरसेवक हणमंत जगदाळे, बाबाजी पाटील, दशरथ तिवरे, आदी उपस्थित होते.
२१ जागांसाठी ३० मार्चला मतदान
ठाणे मध्यवर्ती सहकारी बँकेच्या २१ जागांसाठी येत्या ३० मार्च रोजी मतदान घेण्यात येणार आहे. त्यासाठी २६ फेब्रुवारी ते ४ मार्च दरम्यान अर्ज वाटप आणि अर्ज स्वीकारण्यात येणार आहेत. ५ मार्च रोजी अर्जांची छाननी होणार असून २१ मार्च ही अर्ज मागे घेण्याची अंतिम तारीख आहे. तर, ३० मार्च रोजी मतदान आणि ३१ मार्च रोजी मतमोजणी होणार आहे.
३ हजार ६८ मतदार करणार मतदान
या निवडणुकीमध्ये कृषी-पतसंस्थांमधून १४, पगारदार पतसंस्थांमधून १, खरेदी-विक्री संघातून १, महिला राखीव २, अनु.जाती-जमातींसाठी १ आणि ओबीसींसाठी १ जागा राखीव आहे. ३ हजार ६८ मतदार या निवडणुकीमध्ये मतदानाचा अधिकार बजावणार आहेत.
