कल्याण पूर्वेत येत्या सोमवारी 20 नोव्हेंबर रोजी मनोज जरांगे पाटील यांची जाहीर सभा कल्याण पूर्वेतील पोटे मैदानात होणार आहे. या जाहीर सभेचे नियोजन मराठा क्रांती मोर्चाच्या वतीने केले जात असून जेसीबीच्या साहयाने मैदानाचे सापाटीकरण करण्यात येत आहे. ठाणे जिल्ह्यात पहिल्यांदाच जरांगे पाटील यांची सभा होणार असल्याने या सभेत जरांगे पाटील काय बोलतात आणि काय भूमिका मांडतात याकडे सर्वांचे लक्ष लागून राहिले आहे. मराठा आरक्षणाचा लढा देणारे मराठा समाजाचे कार्यकर्ते मनोज जरांगे पाटील येत्या सोमवारी कल्याणमध्ये येणार आहेत. मराठा समाजाच्या स्थानिक पदाधिकारी, कार्यकर्त्यांच्या भेटी घेतल्यानंतर त्यांची जाहीर सभा होणार आहे.
कल्याणमधील मराठा क्रांती मोर्चाच्यावतीने या दौर्‍याचे आयोजन केले आहे. गेल्या काही दिवसांपासून जरांगे पाटील यांना कल्याणमध्ये आणण्याचे प्रयत्न मराठा क्रांती मोर्चाच्या पदाधिकार्‍यांकडून सुरू होते. रुग्णालयातून बाहेर पडल्यानंतर मनोज जरांगे पाटील यांनी राज्यभर दौरा करण्याचे जाहीर केले आहे. या पार्श्वभूमीवर जरांगे यांचे कल्याण मध्ये जाहीर सभा होणार आहे. जरांगे पाटील यांच्या सभेच्या निमित्ताने कल्याणमधील राजकीय पक्षात असणारे मराठा नेते एकत्र आल्याचे दिसून येते. याबाबत बोलताना मराठा क्रांती मोर्चाच्या पदाधिकारी अरविंद मोरे यांनी वीस तारखेला जरांगे पाटील यांची सभा होणार आहे. कोळशेवाडीमधील पोटे मैदान हे सभेसाठी जवळपास निश्चित करण्यात आले. संपूर्ण जिल्ह्यातून अंदाजे सुमारे 40 हजार मराठा बांधव या सभेसाठी येणार असल्याचे तसेच सभा ठिकाणच्या रस्त्यालगत मोठ्या 6 एलईडी स्क्रीन लावण्यात येणार असल्याचे संपर्क साधला असता त्यांनी सांगितले.
