शहापूर । शहापूर तालुक्यात शासकीय आरोग्य सेवेचा पुरता बोजवारा उडाला असून येथील आरोग्यसेवा आशा कार्यकर्त्यांच्या खांद्यावर टाकून आरोग्य अधिकारी, आरोग्य सेविका, आरोग्य सेवक आपली जबाबदारी झटकत असल्याचे निदर्शनात आले आहे. याशिवाय तालुक्यातील डोळखांब,शेद्रुण या दोन प्राथमिक आरोग्य केंद्राचा कार्यभार एकच अधिकारी सांभाळत आहेत. या ठिकाणी पुरेशा आरोग्यसेवा पुरवल्या जात नाहीत. तसेच प्राथमिक आरोग्य केंद्र कसारा, वाशिंद या दोन प्राथमिक आरोग्य केंद्राचा कार्यभार कसारा प्राथमिक आरोग्य केंद्रात असलेल्या आरोग्य अधिकारी सांभाळत असल्याने या दोन्ही प्राथमिक आरोग्य केंद्रामध्ये पुरेशा आरोग्य सेवा पुरवल्या जात नसल्याची तक्रार येथील नागरिक आणि रुग्ण करत आहेत.
प्रत्येक आरोग्य केंद्रामध्ये महत्वाचा आरोग्य अधिकारी असणे अनिवार्य असताना देखील एकाच आरोग्य अधिकाऱ्याला दोन ठिकाणी कार्यभार दिला आहे. त्यामुळे शहापूर तालुक्यातील आरोग्य सेवेचा पुरता बोजवारा उडाला आहे. तुटपुंजा मानधनावर काम करणाऱ्या आशा कार्यकर्त्यांवर आरोग्य सेवेची जबाबदारीही दिली जात आहे. त्यामुळे आशा कार्यकर्त्यांनी देखील नाराजी व्यक्त केली आहे. तालुक्यात मलेरिया, डेंगू, अतिसार, ताप, थंडी तसेच विंचू दंश, सर्प दंश, श्वान बाईट या घटनांचा वाढता प्रादुर्भाव आहे. याबाबतची माहिती आरोग्य विभागाकडून कधीही देण्यात येत नाही. याबाबतची माहिती मागितल्यास ती देण्यास हेतू पुरस्कार विलंब केला जात आहे. शासनाकडून लाखो रुपयांचे वेतन घेणारे आरोग्य अधिकारी आणि आरोग्य सेवक, आरोग्य सेविका मात्र आपली जबाबदारी झटकून आशा कार्यकर्त्या आणि त्यांचे सुपरवायझर यांच्यावर आरोग्य सेवेची मदार ठेवून आपली जबाबदारी झटकत असल्याचे शहापूर तालुक्यात दिसून येत आहे.
आरोग्य अधिकारी उपलब्ध होत नसल्याने आरोग्य अधिकाऱ्यांवर दोन दोन प्राथमिक आरोग्य केंद्राची जबाबदारी देण्यात आली आहे. आरोग्य सेविका, आरोग्य सेवक यांच्या विषयी आशा कार्यकर्त्यांची तक्रार असेल तर आम्ही कारवाई करतो.
-गंगाधर परगे, जिल्हा आरोग्य अधिकारी
अशा प्रकारची कुठलीही तक्रार असेल तर आम्हाला पाठवा योग्य ती कारवाई होईल.
भाग्यश्री सोनपिंपले, तालुका आरोग्य अधिकारी