ठाणे । लोकसभा निवडणुकीसाठी उमेदवार स्तरावर अथवा पक्षीय स्तरावर प्रचारासाठी आवश्यक असणार्‍या विविध परवानग्यांसाठी सुविधा पोर्टल suvidha.eci.gov.in चा वापर करावा, असे आवाहन जिल्हाधिकारी तथा जिल्हा निवडणूक अधिकारी अशोक शिनगारे यांनी केले आहे. माध्यम प्रमाणिकरण आणि सनियंत्रण, मतदार जनजागृती स्वीप, मनुष्यबळ, वाहने, टपाली मतपत्रिका, आचारसंहिता, ईव्हीएम मशीन, मतदान केंद्र नियोजन, कायदा व सुव्यवस्था, निरिक्षकांची व्यवस्था, स्ट्राँग रुम व्यवस्था, दिव्यांग मतदार सुविधा आदींबाबत जिल्हाधिकारी शिनगारे वेळोवेळी आढावा घेत असून संबंधित नोडल अधिकार्‍यांकडून केलेल्या कार्यवाहीची ते नियमितपणे माहिती घेत आहेत.
उमेदवारास वैयक्तिक स्तरावर अथवा पक्षीय स्तरावर प्रचारासाठी आवश्यक असणार्‍या विविध परवानग्यांसाठी भारत निवडणूक आयोगाच्या ’सुविधा’ या पोर्टलवर ऑनलाईन अर्ज करुन परवानगी घेता येते. निवडणूकसंबंधी कोणत्याही विषयात आचारसंहितेचे तंतोतंत पालन होईल, याची कटाक्षाने दक्षता घ्यावी. संबंधित नोडल अधिकार्‍यांनी सतर्क राहून दिलेल्या जबाबदार्‍या पूर्ण क्षमतेने पूर्ण कराव्यात, असेही जिल्हाधिकारी शिनगारे यांनी संबंधित नोडल अधिकार्‍यांना सांगितले आहे.
