पुंटा गोर्डा: क्युबामध्ये विध्वंस घडवून आणल्यानंतर ‘इयान’ (इयान चक्रीवादळ) या भीषण चक्रीवादळाने अमेरिकेच्या फ्लोरिडा राज्यात जोरदार दणका दिला आहे. इयान चक्रीवादळ बुधवारी फ्लोरिडाच्या नैऋत्य किनार्‍यावर शक्तिशाली वारा आणि मुसळधार पावसासह धडकले आहे. त्यामुळे तेथील रस्ते जलमय झाले असून अनेक गाड्या त्यात वाहून गेल्या आहेत. फ्लोरिडामध्ये “विनाशकारी” चक्रीवादळामुळे मोठ्या प्रमाणात नुकसान झाल्याची माहिती आहे.
National Hurricane Center (एनएचसी)ने म्हटले आहे की, ‘इयान’ ताशी 240 किलोमीटर वेगाने फ्लोरिडा किनाऱ्यावर धडकले. जेव्हा वादळ आले तेव्हा तिथे आधीच पाऊस पडत होता. वादळाच्या प्रभावामुळे पूरस्थिती निर्माण झाली आहे.
वादळामुळे संपूर्ण फ्लोरिडा आणि जॉर्जिया आणि दक्षिण कॅरोलिना या दक्षिण-पूर्व राज्यांमध्ये लाखो लोकांचे नुकसान होण्याची शक्यता आहे. दरम्यान, बोट बुडाल्यानंतर 20 स्थलांतरित बेपत्ता असल्याचे यूएस बॉर्डर पेट्रोलने सांगितले. तटरक्षक दलाने फ्लोरिडा कीजमध्ये पोहणाऱ्या चार क्यूबाई आणि इतर तीन जणांना वाचवले आहे.
नॅशनल वेदर सर्व्हिसचे संचालक केन ग्राहम म्हणाले, हे वादळ एक महाकाय असणार आहे, ज्याबद्दल आपण पुढील अनेक वर्षे चर्चा करू. ही ऐतिहासिक घटना आहे.
वीजपुरवठा खंडित –
इयान चक्रीवादळामुळे टाम्पा आणि ऑरलैंडो येथील विमानतळांवरील सर्व व्यावसायिक उड्डाणे बंद झाली आहेत आणि 850,000 घरांचा वीजपुरवठा खंडित झाला आहे. अधिकाऱ्यांनी सर्व भागात इशारे जारी केले आहेत आणि दोन फूट (61 सेमी) पर्यंत पाऊस पडण्याची शक्यता असल्याचे सांगितले आहे. येत्या २४ तासांत राज्यात वादळामुळे मोठ्या प्रमाणावर विध्वंस होण्याची शक्यता आहे.