‘हा दांभिकपणा भाजपच करु शकते’; सचिन सावंत यांची टीका

पोलीस कॉन्स्टेबलला मारहाण करणाऱ्या भाजपच्या कार्यकर्त्यांना सोडा म्हणून सांगणाऱ्या भाजपचे आमदार राम कदम यांच्यावर काँग्रेसचे नेते सचिन सावंत यांनी टीका केली आहे. माजी नौदल अधिकाऱ्याला मारहाण करणाऱ्याला अटक केल्यानंतरही आंदोलन करणारा भाजप पक्ष आता पोलिसाला मारहाण करणाऱ्या भाजप कार्यकर्त्यांना सोडायला सांगत आहे. हा दांभिकपणा भाजपच करु शकते अशी टीका सचिन सावंत यांनी केली आहे. पवई पोलीस ठाण्यातील कॉन्स्टेबलला भाजपच्या कार्यकर्त्यांनी बेदम मारहाण केल्याची घटना समोर आली होती. या घटनेनंतर भाजप आमदार राम कदम यांनी या आरोपींना सोडा, अशी विनंती करणारा फोन मारहाण झालेल्या पोलीस कर्मचाऱ्याला केला. दरम्यान, राम कदम आणि पोलीस कर्मचारी यांच्यातील संवादाची ऑडिओ क्लिप व्हायरल झाल्याने राम कदम आणि भाजपवर जोरदार टीका केली जात आहे.

काँग्रेसचे नेते सचिन सावंत यांनी भाजपचे आमदार राम कदम, अतुल भातखळकर आणि भाजपवर निशाणा साधला आहे. “माजी नौदल अधिकाऱ्याला मारहाण करणाऱ्यांना अटक झाली होती तरी त्याविरोधात आंदोलनाचा तमाशा अतुल भातखळकर यांच्यासह अनेक भाजप नेत्यांनी केला. राज्यपालांना भेटले. आता एका पोलीसाला मारहाण करणाऱ्या भाजप कार्यकर्त्यांना राम कदम सोडा म्हणतात. हा दांभिकपणा, दुतोंडीपणा भाजपाच करु शकते,” अशी टीका सचिन सावंत यांनी केली आहे.