रायगड जिल्ह्यातील अलिबाग, मुरुड आणि रोहा तालुक्यांना जवळ आणणार्‍या कुंडलिका खाडीवरील साळाव रेवदंडा पुलाला भेग पडली आहे. त्यामुळे भरपावसात सावित्री पुलाची पुनरावृत्ती होण्याची भीती व्यक्त करण्यात येत आहे. रायगड जिल्ह्यातील अनेक पुलांची दुरवस्था झाली असली तरी त्याकडे सार्वजनिक बांधकाम विभागाच्या अधिकार्‍यांचे दुर्लक्ष होत आहे. रायगड जिल्ह्याची राजधानी असलेल्या अलिबाग तालुक्यातील रेवदंडा-साळाव आणि साखर खाडी पूल या दोन महत्त्वाच्या पुलांची दुरवस्था झाली आहे. या पुलांची दुरवस्था झाल्यामुळे पुन्हा एकदा रोहा, मुरूड आणि अलिबाग या तीन तालुक्यांचा एकमेकांशी असलेला संपर्क तुटण्याची शक्यता आहे. साळाव -रेवदंडा खाडी पुलाचे काम हे १९८६ साली करण्यात आले असून या पुलाची लांबी ५१० मीटर एवढी आहे. या पुलाला बारा गाळे आहेत.
