‘निसर्ग’ चक्रीवादळाने कोकणाचे मोठ्या प्रमाणात नुकसान केले असून या नुकसानीच्या पाहणीसाठी राष्ट्रवादी काँग्रेसचे राष्ट्रीय अध्यक्ष शरद पवार हे दोन दिवस कोकण दौरा करणार आहेत. ९ जून रोजी रायगड आणि १० जूनला रत्नागिरी जिल्ह्यातील नुकसानग्रस्त भागाची पाहणी करून शेतकर्‍यांच्या भेटी घेऊन संपूर्ण माहिती ते जाणून घेणार आहेत.
दरम्यान ९ जून रोजी सकाळी ८.३० वाजता मुंबईतून ते गाडीने जाणार असून, सकाळी ११.३० वाजता माणगाव, १२.३० वाजता म्हसळा, १ वाजता दिवेआगार, २ वाजता श्रीवर्धन, ४ वाजता श्रीवर्धन येथे आमदार, खासदार आणि अधिकारी यांच्यासोबत बैठक, सायंकाळी ५ वाजता हरिहरेश्वर आणि नंतर ६ वाजता बागमांडला मार्गे दापोलीकडे रवाना होणार आहेत.
दापोली येथे ते मुक्काम करणार आहेत. दरम्यान यावेळी राष्ट्रवादीचे नेते खासदार सुनिल तटकरे, रायगडच्या पालकमंत्री आणि विधी व न्याय राज्यमंत्री आदिती तटकरे व स्थानिक आमदार उपस्थित राहणार आहेत. १० जून रोजी रत्नागिरी जिल्हा दौरा असून, सुरुवातीला दापोली येथील नुकसानीची पाहणी करणार आहेत.
दरम्यान राज्य सरकारने रायगड जिल्ह्याला 100 कोटी आणि रत्नागिरी-सिंधुदुर्ग जिल्ह्याला 100 कोटी तातडीची मदत जाहीर केली आहे. मात्र आता शरद पवार यांच्या दौर्‍यानंतर कोकणवासीयांच्या पदरात आणखी काही मदत मिळते का हे पाहणे महत्त्वाचे ठरणार आहे.