कर्जत तालुक्यातील वर्षा सहलींवर यार्षीही 5 जुलैपासून 4 सप्टेंबरपर्यंत बंदी घालण्यात आली असून, सर्व धबधबे आणि धरणे यांच्या आसपास प्रवेश करू नये यासाठी पोलीस बंदोबस्त ठेवला जाणार आहे.स्वाभाविक पर्यटकांच्या लाडक्या सोलनपाडा धरणाची अवस्था पोलिसांच्या नजरकैदेत असल्यासारखी झाली आहे.
सोलनापाडा धरणासह अनेक आकर्षक पर्यटनस्थळांची कर्जत तालुक्यात रेलचेल असून सोशल मीडियामुळे दूरदूरहून पर्यटक येथे येत असतात. मात्र काही पर्यटक फाजील उत्साह दाखवत असल्याने अपघातांची संख्या वाढते. त्यामुळे प्रशासनाने गर्दी असणार्‍या ठिकाणांवर निर्बंध लादले आहेत. याबाबत पर्यटकांसह स्थानिकांची नाराजी असली तरी प्रशासन आपल्या भूमिकेवर ठाम आहे. दुसरीकडे सोलनपाडा ग्रामस्थ मात्र आमच्याकडे पर्यटक नकोत, अशी भूमिका घेत आहेत. 2016 ते 18 मध्ये मोठ्या प्रमाणात पावसाळी सहलीसाठी आलेल्या पर्यटकांचे पाण्यात बुडून जाऊन, वाहून जाऊन मृत्यू झाले होते. त्यामुळे 2018 मध्ये तब्बल तीन महिने धरणे आणि धबधबे यांच्या परिसरात जाण्यास जमावबंदी आदेश जारी करण्यात आला होता. मात्र तरीही अतिउत्साही पर्यटक जमावबंदीचा आदेश मोडत असल्याने प्रशासनाने यावेळी कठोर पावले उचलली आहेत.
प्रशासनाच्या निर्णयामुळे चोहोबाजूंनी टीका होत असून, सरसकट बंदी नाही तर अटी आणि शर्थी घालून बंदी घालण्यात आल्याची माहिती प्रशासन देत आहेत. 2018 मध्ये तालुक्यातील सोलनपाडा पाझर तलाव, पाली भुतिवली धरण, आषाणे धबधबा, पेब किल्ला, पळसदरी तलाव, बेडीसगाव धबधबा, जुम्मापट्टी धबधबा, टपालवाडी आदी ठिकाणी तब्बल 17 जणांचे बळी गेले आहेत. गेल्या दहा वर्षातील मृतांचा आकडा पाऊणशेच्या घरात आहे.
यावर आणली आहेत बंधनेः-
१) मद्य वाहतूक, विक्री व पिणे, 2) धोकादायक वळण, पाण्याजवळ सेल्फीसह शूटिंग, ३) वेगाने वाहणार्‍या पाण्यात, ओढ्यात, धरणात उतरणे आणि पोहणे, ४) धरणाच्या सांडव्याखाली जाणे, बसणे, तसेच धबधब्याच्या प्रवाहात बसणे, ५) धबधबे आणि धरण परिसरात सकाळी 6 पासून सायंकाळी 6 पर्यंत थांबणे, ६)धोकादायक वाहने चालविणे आणि वाहतूक कोंडीस कारणीभूत ठरणे, ७) वेगाने वाहने चालविणे, वाहने रस्त्यावर थांबवून ठेवणे, ८) ओव्हरटेक करणे, ९) प्लास्टिक पिशव्या व बाटल्या, काचेच्या बाटल्या या आणणे आणि तेथेच टाकून देणे, १०) महिलांशी असभ्य वर्तन करणे, मुलींची छेडछाड करणे, अश्लील हावभाव करणे, टिंगलटवाळी करणे, ११) परिसराची शांतता भंग होईल अशी वाद्ये वाजविणे, डीजे सिस्टिम लावणे, वाहनात साऊंड सिस्टीम लावून ध्वनी प्रदूषण करणे, १२) आग, वायू, जल प्रदूषण होईल असे कृत्य करणे व १३) धरण, धबधबे या ठिकाणी एक किलोमीटर परिसरात प्रवेश करणे.