विद्यार्थ्यांच्या विकासात शिक्षक आणि पालक अशा दोघांचीही भूमिका महत्त्वाची आहे. शाळा व्यवस्थापन समिती ही मुख्यत्वेकरून पालकांचे प्रतिनिधित्व करते. शाळा व्यवस्थापन समिती हा घटक सक्षम झाल्यास शाळा विकासात लोकसमुदायाचा सहभाग अधिक वाढेल. त्यातून शिक्षक–पालक सुसंवाद निर्माण होईल आणि १००% विद्यार्थी प्रगत करण्यासाठी त्याचा उपयोग होईल, या उद्देशाने गुणवत्ता विकासासाठी शालेय व्यवस्थापन समित्यांचे सक्षमीकरण करण्यासाठी यावर्षीची ‘शिक्षणाची वारी’ मुंबई येथे आयोजित करण्यात आली आहे. मुंबईत एमएमआरडीए मैदान, बीकेसी, वान्द्रे पूर्व येथे २८ ते ३० नोव्हेंबर, २०१८ या कालावधीत ही वारी आयोजित करण्यात आली आहे.
एमएमआरडीएमध्ये भरणार शिक्षणाची वारी
‘शिक्षणाची वारी’चे यंदाचे हे चौथे वर्ष आहे. आतापर्यंत आयोजित केलेल्या शिक्षणाच्या वारीमध्ये सुमारे लाखभर शिक्षक, पालक आणि शिक्षणप्रेमी नागरिकांनी विविध नावीन्यपूर्ण प्रयोगांचा लाभ घेतला आहे. यापूर्वी पुणे, औरंगाबाद, नागपूर, अमरावती, नाशिक आणि रत्नागिरी येथील यशस्वी आयोजनानंतर यावेळी मुंबई, कोल्हापूर, वर्धा, नांदेड आणि जळगाव येथे वारीचे आयोजन करण्यात आले आहे. या टप्प्यातील पहिली वारी मुंबईत एमएमआरडीए मैदान, बीकेसी, वान्द्रे पूर्व येथे दि. २८ ते ३० नोव्हेंबर, २०१८ या कालावधीत होत आहे. मुंबईच्या वारीत रायगड, पालघर, ठाणे, मुंबई उपनगर आणि मुंबई शहर या जिल्ह्यातील शाळा व्यवस्थापन समितीचे सदस्य व शिक्षक भेट देणार आहेत. दुपारी २ ते सायंकाळी ६ वाजेपर्यंत सर्व शिक्षणप्रेमींसाठी ही वारी खुली असणार आहे.
अनेक उपक्रमांची रेलचेल!
शाळा विकास आराखडा आणि शाळा व्यवस्थापन समिती संरचना, पालकांची शाळांना अध्यापनात/कौशल्य विकासात मदत, किशोरवयीन आरोग्य शिक्षण, शालेय पटसंख्येत भरीव वाढ होण्यासाठी राबवण्यात आलेले उपक्रम, लोकसहभाग, शालेय पोषण आहार, स्थलांतरित आणि शाळाबाह्य मुलांना शिक्षणाच्या प्रवाहात आणण्यासाठी समितीचा सहभाग, स्वच्छ भारत–स्वच्छ विद्यालय, दिव्यांग मुलांसाठीचे शिक्षण, गणित आणि भाषा वाचन विकास, कृतियुक्त विज्ञान, तंत्रज्ञानाचा अध्यापनात प्रभावी वापर, कला, कार्यानुभव आणि क्रीडा विषयक उपक्रमांचे प्रयोग येथे मांडण्यात आले आहेत.
तुम्ही हे वाचलंत का? – आता विद्यार्थीही ग्राहक मंचाकडे मागू शकतात दाद
असं असेल वारीचं शेड्युल
या शैक्षणिक प्रयोगांची सर्वांना माहिती व्हावी, शिक्षक आणि शाळा व्यवस्थापन समितीच्या सदस्यांना या प्रयोगांचा अंगीकार करता यावा, अनुभव घेता यावा हा या वारीच्या आयोजनामागील प्रमुख उद्देश आहे. या टप्प्यातील दुसरी वारी कोल्हापूर (१० ते १२ डिसेंबर, २०१८), तिसरी वारी वर्धा (३ ते ६ जानेवारी, २०१९), चौथी वारी नांदेड येथे (२९ ते ३१ जानेवारी, २०१९) आणि पाचवी वारी जळगाव येथे (१५ ते १७ फेब्रुवारी, २०१९) याप्रमाणे होणार आहे.