मुंबई उपनगरने सलग दुसर्यांदा मुलींमध्ये, तर ठाण्याने मुलांमध्ये महाराष्ट्र राज्य कबड्डी असोसिएशनच्या मान्यतेने अहमदनगर जिल्हा हौशी कबड्डी संघटनेच्या विद्यमाने आयोजित ३१ व्या सब-ज्युनियर गट राज्य अजिंक्यपद कबड्डी स्पर्धेचे जेतेपद पटकावले. अहमदनगरच्या रेसिडेंशियल हायस्कूल येथील क्रीडांगणावर ही स्पर्धा पार पडली.
सब-ज्युनियर मुलींच्या अंतिम सामन्यात मुंबई उपनगरने परभणीचा ५७-२७ असा पराभव करत स्व. राजश्री चंदन पांडे चषकावर आपले नाव कोरले. हरजितकौर सिंग, याशिका पुजारी, समृद्धी मोहिते, स्नेहल चिंदरकर यांच्या अप्रतिम खेळाच्या जोरावर मुंबई उपनगरने मध्यंतराला ३४-११ अशी आघाडी घेतली. पूर्वार्धात तीन लोण देणार्या मुंबई उपनगरच्या संघाने उत्तरार्धात आणखी दोन लोण देत सामना तब्बल ३० गुणांच्या फरकाने जिंकला.
मुलांच्या अंतिम सामन्यात ठाण्याने पुण्यावर ४२-१९ अशी मात करत स्व. नारायण नागो पाटील चषक पटकावला. ठाण्याला प्रथमच ही स्पर्धा जिंकण्यात यश आले. पुण्याविरुद्धच्या सामन्याची दमदार सुरुवात करत ठाण्याने मध्यंतराला २२-९ अशी आघाडी घेतली. पुढेही त्यांनी चांगला खेळ सुरु ठेवत हा सामना सहजपणे जिंकला. प्रिन्सकुमार तिवारी, कौस्तुभ शिंदे यांच्या चढाई-पकडीच्या खेळाला ठाण्याच्या विजयाचे श्रेय जाते.