ICC Test Rankings : विराट नंबर दोन! जागतिक कसोटी क्रमवारी जाहीर 

भारताचा कर्णधार विराट कोहलीने जागतिक कसोटी क्रमवारीतील फलंदाजांच्या यादीत दुसरे स्थान पटकावले आहे. मंगळवारी जाहीर झालेल्या क्रमवारीनुसार, कोहलीला एका स्थानाची एका स्थानाची बढती मिळाली असून ८८६ गुणांसह तो दुसऱ्या स्थानावर पोहोचला आहे. या यादीत ऑस्ट्रेलियाचा स्टिव्ह स्मिथ अव्वल स्थानावर आहे. तसेच अव्वल दहा फलंदाजांमध्ये चेतेश्वर पुजारा (सातव्या स्थानी) आणि अजिंक्य रहाणे (दहाव्या स्थानी) यांचाही समावेश आहे. भारतीय संघाने अखेरचा कसोटी सामना मार्चमध्ये न्यूझीलंडविरुद्ध खेळला होता. मात्र, असे असतानाही भारतीय फलंदाजांनी त्यांचे क्रमवारीतील स्थान कायम राखले आहे. भारतीय संघ आता १७ डिसेंबरपासून पुन्हा एकदा कसोटी क्रिकेट खेळताना दिसणार आहे.