बायकोला आनंदी कसं ठेवू? कपिलचा बिग बिंना प्रश्न

विनोदवीर कपिल शर्मा लवकरच त्याची गर्लफ्रेंड गिन्नीसोबत विवाबबंधनात अडकणार आहे. मात्र, लग्नाआधीच त्याने बिग बी अमिताभ बच्चन यांच्याकडून एक खास सल्ला मागितला आहे. लग्न होण्यापूर्वीच ‘बायकोला आनंदी कसं ठेवू’ याबाबतचा सल्ला त्याने बिग बींकडे मागितला. कॉमेडी किंग कपिल शर्मा नुकताच ‘कौन बनेगा करोडपती’ या सोनी वाहिनीवरील रिअॅलिटी शोमध्ये गेला होता. या खास एपिसोडचं शूटिंग पूर्ण झालं असून, लवकरच सोनी चॅनेलवर हा एपिसोड टेलिकास्ट होणार आहे. दरम्यान, सोनीकडून या एपिसोडचा एक प्रोमो शेअर केला आहे. या प्रोमोमध्ये कपिल अमिताभ बच्चन यांच्याकडून लग्नाविषयी सल्ला घेताना दिसतोय. प्रोमोमध्ये बिग बी कपिलला म्हणतायंत, की ‘तू लग्न करणार असल्याचं आम्हाला कळलंय’. यावर उत्तर देताना कपिल म्हणतोय की ‘आता तुम्ही प्रश्न विचारलाच आहेत, तर मला त्याबाबत सल्लाही द्या. लग्नानंतर बायकोला आनंदी ठेवण्यासाठी काय करावं लागेल, असा प्रश्न कपिलने बिग बिंना विचारलाय. यावर हसत हसत उत्तर देत बिग बी म्हणतायत की, ‘पत्नी काहीही बोलली तरी तू आधीच तिला सॉरी म्हणून टाक. यामुळे तुझे सगळेच प्रॉब्लेम्स दूर होतील.’ बिग बींनी कपिलला दिलेल्या या मजेशीर सल्ल्याची सध्या सगळीकडेच चर्चा आहे. हा धमाल प्रोमोही सध्या इंटरनेटवर व्हायरल होतो आहे.