ठाणे : मालमत्ता कराच्या पहिल्या तिमाहीत ठाणे महापालिकेने आर्थिक वर्षाच्या 66 दिवसात 200 कोटी रुपयांची विक्रमी मालमत्ता करवसुली केली आहे. ठाणेकरांनी मालमत्ता कर भरणा करण्यास दिलेला अभूतपूर्व प्रतिसाद प्रशंसनीय असल्याचे महापालिका आयुक्त अभिजीत बांगर यांनी नमूद केले आहे.
ठाणे महापालिकेने चालू (2023-24) आर्थिक वर्षाची देयके 1 एप्रिल 2023 रोजी तयार करुन याबाबत नागरिकांना एस.एम.एसद्वारे अवगत केले होते. या एस.एम.एसद्वारे मालमत्ता कराची देयके डाऊनलोड करणे, प्रिंट करणे तसेच ऑनलाइन पद्धतीने मालमत्ता कर भरण्याकरिता अद्ययावत सुविधा उपलब्ध करुन देण्यात आली होती. याला नागरिकांनी उत्स्फूर्त प्रतिसाद दिला.
मालमत्ता कर नागरिकांना भरणे सोईचे व्हावे यासाठी सर्व प्रभाग समिती कार्यालयात कर संकलन केंद्रे कार्यान्वित करण्यात आली असून कार्यालयीन वेळेत तसेच सार्वजनिक सुट्टीच्या दिवशी सदर केंद्रे सुरू ठेवण्यात आली आहेत. मालमत्ता कराची देयके प्रभाग समिती निहाय सर्व मालमत्ता धारकांना वितरीत करण्यात आली असून सदर मालमत्ता देयके संबंधितांना प्राप्त झालीत की नाही याची खातरजमा करुन कर भरणेबाबत आवाहन करण्यात आले.
ठाणे महापालिकेच्या मालमत्ता कर विभागाला यावर्षी 900 कोटी इतके वसुलीचे उद्दिष्ट देण्यात आले आहे.
1000 कोटी वसुलीसाठी प्रयत्न करावा
सन 2022-23 या आर्थिक वर्षाच्या पहिल्या तिमाहीत मालमत्ता कर वसुली विभागाने 200 कोटी इतकी मालमत्ता कर वसुली केली आहे हे निश्चितच कौतुकास्पद आहे, मालमत्ता कराची वसुलीबाबत सातत्याने नागरिकांमध्ये जनजागृती करण्यात येत असून यावर्षी 1000 कोटींची वसुली करण्याचा प्रयत्न करावी अशी अपेक्षा आयुक्त अभिजीत बांगर व्यक्त केली आहे.
गेल्या वर्षीच्या तुलनेत 90 टक्के वाढ
2022-23 या आर्थिक वर्षात 7 जून 2022 रोजी 108.35 कोटींची वसुली झाली होती. त्या तुलनेत यंदा 92.22 कोटी इतकी वाढीव वसुली म्हणजेच 90 टक्के इतकी आहे. या वर्षी आतापर्यत एकूण 151536 इतक्या मालमत्ताधारकांनी कर भर भरणा केलेला आहे.
कर वसुलीसाठी उपाययोजना
ठाणे महानगरपालिका क्षेत्रातील सर्व नागरिक/ करदात्यांना मालमत्ता करसंलग्न सोयी सुविधा ऑनलाईन पध्दतीने उपलब्ध करुन देण्यात आल्या आहेत. यामध्ये करदाते त्यांच्या घरातून अथवा कार्यालयातून इतर ठिकाणाहून मालमत्ता करसंलग्न सर्व सोई-सुविधा वापरु शकतील. आपल्या मालमत्तेवर किती कर प्रलंबित आहे, जर दंड लागू करण्यात आला असेल तर त्याची रक्कम किती आहे, मालमत्ता कर भरणा कोणकोणत्या पध्दतीने करता येईल अशा सर्व प्रश्नांची उत्तरे नागरिकांना महानगरपालिकेच्या वेबसाईटद्वारे घरच्या घरी मिळू शकतील अशी व्यवस्था करण्यात आली आहे. कोणत्याही प्रकारच्या माहितीसाठी महानगरपालिकेच्या कार्यालयात येण्याची व कोणास भेटण्याची गरज पडू नये अशा पध्दतीने प्रक्रिया सुलभ होईल याकडे विशेष लक्ष देण्यात आले आहे.
प्रभाग कार्यालयात संकलन केंद्रं
मालमत्ता कर भरण्यासाठी ठाणे महापालिकेच्या सर्व प्रभाग कार्यालयात संकलन केंद्रे सुरू करण्यात आलेली आहेत. मालमत्ताधारकांना या केंद्रावर सोमवार ते शनिवार स. 10.00 सायं. 5.00 वा. या वेळेमध्ये मालमत्ता कर जमा करता येईल, त्याशिवाय, ऑनलाईन कर भरणा सुविधाही कार्यरत आहे करदाते त्यांच्या देयकाची संगणकीय प्रत property tax.thanecity.gov.in या लिकद्वारे अथवा प्रभाग कार्यालयाकडील संकलन केंद्रावरून उपलब्ध करून घेवू शकतील. तसेच या लिंकद्वारे इंटरनेट बँकिंग, डेबिट कार्ड, क्रेडिट कार्ड तसेच Google Pay. PhonePe, PayTm, BHIMApp याद्वारे करदाते ऑनलाईन पध्दतीने त्यांचा मालमत्ता कर जमा करू शकतात.
तक्ता 1
प्रभागसमिती करभरणा (कोटी रुपयांमध्ये)
सन 2023-24 सन 2022-23
माजिवडा-मानपाडा 66.04/ 26.47
वर्तकनगर 42.40/ 26.53
नौपाडा कोपरी 29.81/ 17.79
उथळसर 16.57/ 9.61
लोकमान्य-सावरकरनगर 9.97/ 3.48
कळवा 7.54/ 3.27
दिवा 6.69 / 3.16
वागळे इस्टेट 7.24/ 2.95
मुंब्रा 7.16/ 3.87
मुख्यालय 7.15/ 11.22
तक्ता 2
करभरणा रक्कम
ऑनलाईन 85.67 कोटी
धनादेश 83.39 कोटी
रोख 22.67 कोटी
डीडी 14.20 कोटी
कार्ड पेमेंट 0.19 कोटी
हेही वाचा : पाणी टंचाईवर विंधन विहिरीचा उतारा