शहराची मुख्य जबाबदारी असलेल्या महापालिकेला करोनाने विळखा घालायला सुरुवात केली असून ‘स्मार्ट सिटी’च्या एका कर्मचार्‍याचा करोनामुळे मृत्यू झाला आहे. याशिवाय महापालिकेतील सुमारे १८ कर्मचार्‍यांना करोनाची लागण झाली आहे. आयुक्त राधाकृष्ण गमे यांचे स्वीय सहाय्यकांचा देखील रिपोर्ट पॉझिटिव्ह आला आहे. कर्मचार्‍यांची वाढती संख्या बघता गुरुवारी (दि. २५) करोना विषयावर होणारी ऑनलाईन महासभा देखील महापौरांनी पुढे ढकलली आहे. दरम्यान, कर्मचार्‍यांचे रिपोर्ट पॉझिटिव्ह आल्याने महापालिकेतील नगररचना विभाग आणि आयुक्त कार्यालय नागरिकांसाठी तात्पुरत्या स्वरुपात बंद करण्यात आले आहे.
काही दिवसांपूर्वीच नगररचना विभागातील एका कर्मचार्‍याचा रिपोर्ट पॉझिटिव्ह आला होता. त्यामुळे या विभागातील २३ कर्मचार्‍यांना क्वारंटाईन करण्यात आले. ज्यांच्यात कोणतीही लक्षणे आढळून आलेले नाहीत त्यांना घरीच क्वारंटाईन करण्यात आले. उर्वरित काही कर्मचार्‍यांची करोना टेस्ट करण्यात आली. सुदैवाने या टेस्टचे रिपोर्ट निगेटिव्ह आल्याने कर्मचार्‍यांनी सुटकेचा नि:श्वास सोडला आहे. मात्र हा विभागही आता तात्पुरत्या स्वरुपात नागरिकांसाठी बंद करण्यात आला आहे. याशिवाय पश्चिम प्रभागातील विद्युत विभागातील एका चालकाचा रिपोर्ट पॉझिटिव्ह आला. त्यामुळे या चालकासोबत काम करणार्‍या तिघा कर्मचार्‍यांना क्वारंटाईन करण्यात आले आहे. तसेच सिडको, सातपूर, पंचवटी या विभागीय कार्यालयातील स्वच्छता निरीक्षक, सफाई कामगार, वाहन चालक यांनाही कोरोनाची लागण झाली आहे.
महापालिकेतील हे पॉझिटिव्ह पेशंट
- आयुक्तांचे स्वीय सचिव
- विद्युत विभागाचा चालक
- नगररचना विभागातील शिपाई
- सिडकोतील स्वच्छता निरीक्षक
- सातपूरमधील सफाई कामगार
- पंचवटीतील वाहनचालक
- झाकिर हुसेन रुग्णालयातील १० आरोग्य सेवक
- इंदिरा गांधी रुग्णालयातील आया
महापालिकेच्या कर्मचार्‍यांच्या बाबतीत पुरेशी सुरक्षीततेच्या दृष्टीने काळजी घेतली जात आहे. लोकप्रतिनिधींसह विविध भागांतील नागरिकांचा महापालिकेत नेहमीच वावर असतो. नागरिकांनी लक्षात घ्यावे की, महापालिकेची कर्मचार्‍यांना करोनाशी संबंधित विविध जबाबदार्‍या देण्यात आल्या आहेत. मात्र हे कर्मचारीच पॉझिटिव्ह आढळून आले तर ही आजारावर नियंत्रण कोण आणणार? त्यामुळे नागरिकांनी मुख्यालयात वा विभागीय कार्यालयांत येऊन आपली कामे करण्यापेक्षा एनएमसी इ कनेक्ट अ‍ॅप्लीकेशनचा वापर करावा. त्यांच्या तक्रारींची दखल निश्चित घेतली जाईल. मुख्यालय नियमीतपणे सॅनिटाईज केले जात आहे. त्यामुे कर्मचार्‍यांचे मनोबल चांगले आहे. शहराचे काम सुरळीत ठेवण्यासाठी आमचे प्राधान्य आहे. त्यादृष्टीने नागरिकांनीही सहकार्य करावे ही अपेक्षा.
-राधाकृष्ण गमे, महापालिका आयुक्त
