महाविकासआघाडीच्या शिल्पकारांपैकी एक असलेले राष्ट्रवादी काँग्रेसचे अध्यक्ष शरद पवार यांच्या हत्येचा कट रचला जात असल्याची तक्रार पुणे पोलिसांत दाखल झाली आहे. पुण्याच्या शिवाजी नगर पोलीस ठाण्यात ही तक्रार दाखल झाली असून राष्ट्रवादी काँग्रेसचे कार्यकर्ते-पदाधिकारी लक्ष्मीकांत खाबिया यांनी ती नोंदवली आहे. या प्रकरणी समाजमाध्यमातून मोठ्या प्रमाणावर चिथावणीखोर वक्तव्य, पोस्ट केल्या जात असून शरद पवारांना संपवण्याची भाषा केली जात असल्याचं या तक्रारीत खाबिया यांनी म्हटलं आहे. दरम्यान, यामध्ये ज्येष्ठ पत्रकार आणि राजकीय विश्लेषक भाऊ तोरसेकर आणि काही सोशल मीडिया हत्येला चिथावणी देत असल्याचं तक्रारीमध्ये खाबिया यांनी नमूद केलं आहे.
हेही वाचा – मला लाल शाईची सवय; हिरव्या शाईचा विचार कधी केला नाही-शरद पवार
शरद पवारांच्या हत्येचा कट सुरू असून महाविकास आघाडीचं सरकार उलथवून टाकण्याचं देखील कारस्थान सुरू असून त्यावर तातडीने कारवाई करण्यात यावी, असं या तक्रारीत म्हटलं आहे. विधानसभा निवडणुका संपल्यानंतर हे थांबेल असं वाटलं होतं. पण महाविकासआघाडीचं सरकार आल्यानंतर भाऊ तोरसेकर, धनशाम पाटील आणि इतरांनी युट्यूबवर अपलोड केलेल्या व्हिडिओवरची भाषणं शरद पवारांना संपवलं पाहिजे, बॉम्ब-गोळ्यांचा वापर केला पाहिजे अशी चिथावणीखोर वक्तव्य त्यात आहेत असं निदर्शनास आलं आहे’, असं देखील या पत्रात म्हटलं आहे.
