PHOTO: राणीच्या बागेतील बंगाल टायगरलाही उन्हाची झळ, पाण्यात पोहतानाचे फोटो व्हायरल
Vaibhav Desai
गेल्या काही दिवसांपासून राज्यात उष्म्याचं प्रमाण वाढलं आहे. विशेष म्हणजे या उष्म्याची माणसांबरोबर पशु-पक्ष्यांना झळ जाणवतेय. त्यामुळेच अनेकदा घराच्या बाहेर पक्ष्यांसाठी अनेक जण पाणी ठेवताना दिसतात. राणीच्या बागेतही प्राण्यांनाही ही उन्हाची काहिली नकोशी झालीय. (सर्व छायाचित्रं : सचिन हरळकर)
राणीच्या बागेत आणण्यात आलेले वाघ हे तापत्या उन्हात पाण्यात मनमुराद आनंद लुटताना पाहायला मिळतायत. राणीच्या बागेत 2006 पूर्वी एक पट्टेरी वाघाची जोडी होती. त्यापैकी मादी 2004 साली मृत्युमुखी पडली, तर नर वाघाचा 2006 साली मृत्यू झाला.
त्यानंतर तब्बल 15 वर्षांनंतर राणीबागेत बंगाल टायगरची जोडी आणण्यात आली आहे. औरंगाबाद येथून सिद्धार्थ प्राणिसंग्रहालयातून आणलेल्या या जोडीला 14 नोव्हेंबर 2021 ला एक बछडाही झाला.
करिश्मा आणि शक्ती असे या वाघांच्या जोडीच्या बछड्याचे नाव वीरा ठेवण्यात आले असून, सध्या वीरा लहान असल्याने राणीच्या बागेत येणाऱ्या पर्यटकांना तिला पाहायला मिळत नाही.
विशेष म्हणजे राणीच्या बागेचा इतिहासही रंजक आहे. इंग्लंडच्या राणीसाठी मुंबईच्या भायखळा येथे खास उद्यान बनवण्यात आले होते, त्यात प्राणी-पक्षी आणि विविध प्रकारची झाडे लावण्यात आली होती.
सदर उद्यान 1861 साली म्हणजे स्वातंत्र्यपूर्व काळात तयार करण्यात आले आहे.
इंग्लंडच्या राणीसाठी हे उद्यान बनवले असल्याने या उद्यानाचे नाव ‘व्हिक्टोरिया गार्डन’ असे ठेवले होते. त्यालाच मराठीमध्ये ‘राणीची बाग’ असे म्हटले जाते.
राणीच्या बागेत गेल्यानंतर क्वचितच या वाघांचं दर्शन होते, कारण ते आपल्या गुह्येत आराम करत असतात.
राणीच्या बागेत या बंगाल टायगरला पाहण्यासाठी पर्यटकांचीही मोठी गर्दी असते. तसेच एवढ्या जवळून वाघ पाहण्याचा क्षण काही वेगळाच असतो.
