गोलंदाजांच्या भेदक माऱ्याच्या जोरावर झिम्बाब्वेने दुसऱ्या टी-२० सामन्यात पाकिस्तानला पराभवाचा धक्का दिला. झिम्बाब्वेने हा सामना १९ धावांनी जिंकला. या सामन्यात झिम्बाब्वेने प्रथम फलंदाजी करताना २० षटकांत ९ बाद ११८ धावा केल्या होत्या. याचा पाठलाग करताना पाकिस्तानचा डाव अवघ्या ९९ धावांत आटोपला आणि त्यांनी हा सामना गमावला. या विजयासह झिम्बाब्वेने तीन सामन्यांच्या या मालिकेत १-१ अशी बरोबरी केली. या सामन्यात झिम्बाब्वेकडून ल्यूक जोंग्वेने १८ धावांत ४ विकेट घेतल्या. त्याला रायन बुर्लने दोन विकेट घेत चांगली साथ दिली. आयसीसीच्या टी-२० क्रमवारीत पाकिस्तानचा संघ चौथ्या, तर झिम्बाब्वेचा संघ ११ व्या स्थानी आहे. त्यामुळे झिम्बाब्वेसाठी हे मोठे यश आले.
Zimbabwe recorded their first ever T20I win against Pakistan after a spectacular 19-run series-levelling victory.#ZIMvPAK report 👇
— ICC (@ICC) April 23, 2021
बाबर आझमची एकाकी झुंज
या सामन्यात पाकिस्तानने नाणेफेक जिंकून प्रथम गोलंदाजी स्वीकारली आणि त्यांनी झिम्बाब्वेला २० षटकांत ९ बाद ११८ धावांवर रोखले. झिम्बाब्वेच्या तिनाशे कामनुहूकाम्वेने ३४ धावांची खेळी केली. तर पाकिस्तानच्या मोहम्मद हसनैन आणि दानिश अझीझने २-२ विकेट घेतल्या. ११९ धावांचा पाठलाग करताना पाकिस्तानचा डाव ९९ धावांत आटोपला. कर्णधार बाबर आझमने एकाकी झुंज देत ४१ धावा केल्या. त्याला इतरांची साथ लाभली नाही.