महाराष्ट्र नवनिर्माण सेनेचे अध्यक्ष राज ठाकरे आज, शनिवारी त्यांच्या कुटुंबासह लोणावळ्यातील एकवीरा देवीच्या दर्शनाला गेले होते. सकाळी दर्शन घेऊन मुंबईच्या दिशेने परतत असताना त्यांच्या ताफ्यातील ३ गाड्यांचा अपघात झाल्याची माहिती समोर येत आहे. या गाड्यांमधील तीन जण किरकोळ जखमी झाल्याचे सांगितले जात आहे. विधानसभा निवडणुकीच्या पार्श्वभूमीवर मनसे अध्यक्ष राज ठाकरे लवकरच जाहीर सभांचा धडाका सुरू करणार आहेत. त्यापूर्वी त्यांनी आज ठाकरे घराण्याची कुलदेवी एकविरा आईचे सहकुटुंब दर्शन घेतले. यावेळी राज ठाकरे यांची पत्नी शर्मिला, मुलगा अमित, मुलगी उर्वशी आणि इतर सहकारी उपस्थित होते.
काय आहे घटना
एकविरा देवीचे दर्शन घेऊन मुंबईच्या दिशेने परतत असताना राज ठाकरे यांच्या ताफ्यातील ३ गाड्यांचा अपघात झाला. हा अपघात नवी मुंबईतील सानापाडा येथे झाल्याचे समजते. या घटनेत शर्मिला ठाकरे यांनाही किरकोळ दुखापत झाली असून आणखी दोन जण जखमी झाल्याचे सांगितले जात आहे. दरम्यान, गाड्यांचा संपूर्ण ताफा मुंबईच्या दिशेने येत असल्याचे समजते.
थोडक्यात घटनाक्रम –
- राज ठाकरे यांच्या ताफ्यातील ३ गाड्याचा अपघात
- दुपारी दीड वाजता एकविरा देवीच्या दर्शनावरून येतानाची घटना
- नवी मुंबईतील सानपाडाजवळ घडला अपघात
- २ इनोव्हा आणि १ सिलेरो या गाड्यांमध्ये अपघात
- तिन्ही गाड्या राज याच्या ताफ्यातील
- सुरक्षित अंतर न ठेवल्याने झाला अपघात
- राज ठाकरे सुखरूप घरी पोहचले