पंतप्रधान नरेंद्र मोदी यांनी गौतम बुद्ध नगरच्या जेवरमध्ये नोयडा आंतरराष्ट्रीय विमानतळाचे उद्घाटन केले. नोयडा आंतरराष्ट्रीय विमानतळाच्या उद्घाटनात पंतप्रधान मोदींनी प्रथम येथील एका प्रदर्शनाला भेट दिली. त्यानंतर उत्तर प्रदेशचे मुख्यमंत्री योगी आदित्यनाथ यांनी पंतप्रधान मोदी यांचे स्वागत केले. यावेळी उपस्थितीत असलेल्या जनतेला पंतप्रधान नरेंद्र मोदी यांनी संबोधित केले. ‘आता जेवर आंतरराष्ट्रीय स्तरावर आले आहे आणि याचा लाभ उत्तर प्रदेशच्या जनतेसोबत दिल्ली एनसीआरला देखील होणार आहे. तसेच या आंतरराष्ट्रीय विमानतळामुळे रोजगार संधी निर्माण होणार आहेत’, असे पंतप्रधान नरेंद्र मोदी म्हणाले.
पंतप्रधान नरेंद्र मोदी पुढे म्हणाले की, ‘देशातील विमान वाहतूक क्षेत्रात झपाट्याने वाढ होत आहे. भारतीय कंपन्या शेकडो विमान खरेदी करत आहेत. त्यांच्यासाठी नोयडा आंतरराष्ट्रीय विमानतळाची मोठी भूमिका असेल. विमानांच्या देखभाल आणि दुरुस्तीसाठी हे विमानतळ मोठे केंद्र असेल. देश-विदेशातील विमानांना येथे सेवा दिली जाईल आणि तरुणांना रोजगाराची संधी उपलब्ध होईल.’
‘आज आपण ८५ टक्के विमानं देखभालीसाठी परदेशात पाठवतो. दुरुस्तीसाठी १५ हजार रुपये कोटी खर्च होतात. हे आंतरराष्ट्रीय विमानतळ ही परिस्थिती बदलण्यास मदत करेल. या विमानतळाच्या माध्यमातून मल्टी मॉडेल कॉर्गोचे स्वप्न पूर्ण होऊ शकते. तसेच या पूर्ण क्षेत्रातील विकासाला गती मिळेल,’ असे पंतप्रधान नरेंद्र मोदी म्हणाले.
नोयडा आंतरराष्ट्रीय विमानतळाचे वैशिष्ट्ये
- या विमानतळावर एकूण ५ धावपट्टी असतील. पहिल्या टप्प्यात २ धावपट्टी तयार केल्या जातील. तर दुसऱ्या टप्प्यात ३ धावपट्टी तयार केल्या जातील.
- हे विमानतळ एकूण ३३०० एकर जमिनीवर तयार केले जाईल. या विमानतळासाठी जवळपास ३० हजार कोटी रुपये लागतील.
- नोयडा आंतरराष्ट्रीय विमानतळावरील उत्तर धावपट्टी आणि दक्षिण धावपट्टी अशा दोन धावपट्टी तयार होती. उत्तर धावपट्टीवरच VVIP टर्मिनल असेल. म्हणजेच उत्तर धावपट्टीवरून VVIP लोकांची विमाने उड्डाणे करतील. धावपट्टीची लांबी ४ किलोमीटरहून अधिक असणार आहे.
- दोन्ही धावपट्टीवर एकूण १८६ विमान पार्क करण्यासाठी स्टँड केले जातील.
- विमानतळाच्या जवळ सार्वजनिक वाहतुकीच्या रुपात आणखीन एक पर्याय उपलब्ध असेल. ज्यामध्ये रेल्वे स्टेशनचा समावेश असेल. येथून तुम्ही मेट्रो किंवा हायस्पीड ट्रेनमधून प्रवास करून जवळच्या शहरात जाऊ शकता.
- मेट्रो स्टेशनच्या जवळ हवाई प्रवाशांना बसण्यासाठी एक वेगळ्या टर्मिनलची व्यवस्था केली जाईल.
- उत्तर आणि दक्षिण दोन्ही धावपट्टी दरम्यान एटीसी टॉवर बांधले जाईल. तसेच दक्षिण धावपट्टीच्या येथे बचाव आणि अग्निशमन यंत्रणेची इमारत असेल.
- तसेच विमानतळाजवळ एक मोठे सेंट्रल किचन तयार केले जाईल.
- दक्षिण धावपट्टीच्या उजव्या बाजूला पावसाचे पाणी साठवण्यासाठी एक तलाव बांधले जाईल.
- याशिवाय यमुना एक्स्प्रेसवे, इस्टर्न पेरिफेरल एक्स्प्रेसवे आणि जवळील मुख्य रस्ते आणि राजमार्गांना नोयडा विमानतळ जोडले जाईल. नोयडा आंतरराष्ट्रीय विमानतळावरून फक्त परदेशातील प्रवास होणार नाही तर देशातील सर्वात मोठे कार्गो हब विमानतळावर असणार आहे. विमानतळावरील कार्गो टर्मिनलची क्षमता २० लाख मेट्रिक टन असेल, ती वाढवून ५० लाख मेट्रिक टन करण्यात येईल. औद्योगिक उत्पादनांची वाहतूक या कार्गो हबमुळे सुलभ होईल. तसेच यामुळे आंतरराष्ट्रीय बाजारपेठेत स्थानिक उत्पादने नेण्यास मदत होईल.
हेही वाचा – भारतात चारपैकी एका मुलीचा बालविवाह, देशाच्या लोकसंख्येत घसरण – NFHS-5 सर्वेक्षण