जेव्हा अशोक सराफ बनतात ‘लव्हगुरू’

‘हृदयात समथिंग समथिंग’ या आगामी मराठी चित्रपटाची सध्या सगळीकडे चर्चा आहे. रोमँटिंक कथानक असलेल्या या चित्रपटात अनिकेत विश्वासराव आणि स्नेहा चव्हाण यांच्या प्रमुख भूमिका आहेत. खऱ्या आयुष्यात नुकताच साखरपुडा केलेलं हे कपल आता पडद्यावरही रोमान्स करताना दिसणार आहेत. मात्र, या ‘हृदयात समथिंग समथिंग‘चं विशेष आकर्षण ठरतायत सर्वांचे लाडके ‘अशोक मामा’ अर्थात अभिनेते अशोक सराफ. मराठीतील विनोदवीर अशोक सराफ या चित्रपटात एका खास भूमिकेत दिसणार आहेत. गेली अनेक वर्षे प्रेक्षकांना हसवणारे अशोक मामा या चित्रपटात ‘लव्हगुरू’च्या भूमिकेत दिसणार आहेत. काहीच दिवसांपूर्वी  ‘हृदयात समथिंग समथिंग’चं पोस्टर रिलीज झालं होतं. ‘हृदयात समथिंग समथिंग’ या चित्रपटाची निर्मिती विनोदकुमार जैन, शैलेंद्र पारख, स्वप्नील चव्हाण आणि अतुल गुगळे यांनी केली आहे. तर सचिन नथुराम संत यांनी सहनिर्मिती केली असून या चित्रपटाचे दिग्दर्शन प्रवीण कारळे यांनी केले आहे.

चित्रपटाचे निर्माते विनोदकुमार जैन एका मुलाखतीदरम्यान म्हणाले, ‘आपण गेल्या अनेक वर्षांपासून अशोक सराफ यांना कॉमेडीचा बादशाह म्हणून ओळखतो. मात्र, या चित्रपटात तुम्ही अशोक मामांचा एक नवा अंदाज पाहायला मिळेल. लव्हगुरु साकारणाऱ्या अशोक सराफ यांचं चित्रपटात कॉमेडी आणि रोमँटिक मूडचं एक वेगळंच मिश्रण पाहायला मिळणार आहे. प्रेक्षकांनाही त्यांची लव्हगुरुची भूमिका आवडेल असा आम्हाला विश्वास आहे.’