आजवर ५००पेक्षा अधिक रुग्णांना ज्याने वेळेत हॉस्पिटलपर्यंत पोहोचवले, त्यातील ५० पेक्षा अधिक रुग्ण पॉझिटिव्ह असूनही कोणतीही कानकूच न करता जीवावर उदार होत त्यांची वाहतूक केली.. बरे झालेल्या रुग्णांना सुखरुप घरी आणले त्या अ‍ॅम्बलुन्सचालकालाही करोनाने घेरले. मोरवाडी रुग्णालयात कार्यरत या चालकाने पीपीई किट, ग्लोव्ज, सॅनिटायझरचा नित्याने वापर अशा सुरक्षिततेच्या साधनांचा उपयोग करुनही या चालकाला करोनाची बाधा झाल्याने त्याला स्वत:लादेखील धक्का बसला आहे. हा आजार कशामुळे जडला असेल याचा अतिशय धक्कादायक अंदाज त्याने ‘आपलं महानगर’शी बोलताना वर्तवला.
कामात कोणताही कंटाळा न करता कॉल येताच काही क्षणातच रुग्णापर्यंत पोहचण्याची या चालकाची हातोटी आहे. स्वत: कंत्राटी कर्मचारी असूनही कायम कर्मचार्‍याला लाजवेल अशी कामगीरी त्याची आहे. ‘रुग्णसेवा हीच इश्वरसेवा’ हे ब्रिद घेऊन हा चालक कार्यरत असतो. काही दिवसांपूर्वी त्याला घसा दुखीचा त्रास होऊ लागला. त्यानंतर सौम्य स्वरुपाचा तापही आला. त्यामुळे त्याची करोनाची टेस्ट केली असता रिपोर्ट पॉझिटिव्ह आले. मात्र आजवर असंख्य रुग्णांना हॉस्पिटलपर्यंत घेऊन जाणे आणि डिस्चार्ज मिळाल्यावर त्यांना घरापर्यंत घेऊन येण्याचे काम त्याने केलेले असल्यामुळे रिपोर्ट बघून तो फारसा हबकला नाही. डॉक्टरांच्या सूचनांचे पालन काटेकोरपणे केले तर हा आजार कंटाळून निघून जाईल यावर त्याचा ठाम विश्वास आहे. या विश्वासानेच तो नाशिकरोड येथील रुग्णालयात दाखल झाला. तेथे डॉ. धनेश्वर यांनी केलेल्या समुपदेशनामुळे त्याच्यातील इच्छाशक्ती अधिक प्रबळ झाली. त्यातून आता हा चालक पूर्णपणे बरा होण्याच्या उंबरठ्यावर आहे. या ‘करोना योध्या’शी ‘आपलं महानगर’ने संपर्क साधत त्याचा अनुभव जाणून घेतला. सुरक्षिततेच्या सर्वच साधनांचा वापर करुनही तो करोनाने बाधित कसा झाला हे ‘आपलं महानगर’ने जाणून घेतले. यावेळी चालकाने व्यक्त केलेला अंदाज हा धक्कादायक आहे.
या दोन कारणांपैकी एकाने झाला अ‍ॅम्बुलन्सचालकाला करोना:
