त्या फाइल्स नेमक्या कोणाच्या? फडणवीसांच्या ट्वीटवरून ठाकरे गटाचा निशाणा

मुंबईः ‘त्या’ फोटोत उपमुख्यमंत्री देवेंद्र फडणवीस नेमक्या कोणाच्या फाईल्सवर सह्या करत आहेत. रोजगार, पाणी, शेतकरी किंवा नागरी समस्यांच्या या फायली आहेत का?, असा सवाल ठाकरे गटाने उपस्थित केला आहे.

मिशन नो पेंडन्सी असे टॅग करुन देवेंद्र फडणवीस यांनी मंत्रालयातील फायलींचा निपटारा करत असल्याचा फोटो काही दिवसांपूर्वी ट्वीट केला होता. या फोटोवर दैनिक सामनाच्या अग्रलेखातून निशाणा साधण्यात आला आहे. भाजप पक्ष व त्यांचे नेते एक नंबरचे नौटंकी आहेत. उपमुख्यमंत्री फडणवीस यांनी स्वतःचा एक फोटो सोशल मीडियावर शेअर केला आहे. त्या फोटोत फडणवीस हे फायली क्लिअर करताना दिसत आहे. खरं तर मंत्रालयात कामाचा डोंगर साचला आहे. त्या डोंगरावर फडणवीस हे आक्रमण करत आहेत. पण या फायली नेमक्या कोणाच्या आहेत?. पायाभूत सुविधा, रोजगार, पाणी, शेतकरी यांच्या विषयीच्या त्या फायली आहेत का?, असा प्रश्न ठाकरे गटाने उपस्थित केला आहे.

पाणी प्रश्नी आंदोलन करणारे ठाकरे गटाचे आमदार नितीन देशमुख यांना पोलिसांनी ताब्यात घेतले. यावरुनही ठाकरे गटाने फडणवीस यांच्यावर टीका केली आहे. अहो फडणवीस महाशय, फायलींचा ढिगारा निपटारा करतानाचा फोटो तुम्ही शेअर करता. त्या फायलींमध्ये अकोल्याच्या पाणी प्रश्नाची फाईल आहे का?, तेवढे काय ते बोला, असा सवाल अग्रलेखातून करण्यात आला आहे.