मुंबईत गेल्या २०१० ते २०२० या दहा वर्षात (२०१७ वगळून) दरड कोसळणे आणि घर, घराच्या भिंती, इमारत दुर्घटना आदीबाबत तब्बल ६ हजार १८४ दुर्घटना घडल्या आहेत. यामध्ये तब्बल ४०४ लोकांचा मृत्यू झाला असून १ हजार ६२४ जण जखमी झाले आहेत. त्यामुळे एवढ्या मोठया प्रमाणात दुर्घटना घडून नागरिक मृत पावले अथवा जखमी झाले तरी सरकार, पालिका प्रशासन त्यांना नोटिसा देण्यापलिकडे काही कारवाई करू शकलेले नाही. मुंबईत दरवर्षी दरड, घरे, इमारती, त्यांचे भाग कोसळणे आदी लहान-मोठ्या दुर्घटना घडतच असतात. केंद्र व राज्य शासन आणि मुंबई महापालिका यांनी अद्यापपर्यंत या धोकादायक इमारती, घरे, दरडी आदींबाबतच्या दुर्घटना पाहता कोणतेही ठोस धोरण बनवलेले नाही. त्यामुळे दरवर्षी अशा दुर्घटना घडत असून त्यामध्ये अनेक निष्पाप नागरिकांचे बळी जात आहेत. अनेकजण जखमी होत आहेत आणि कोट्यवधी रुपयांची वित्तीय हानी होत आहे. मात्र सरकार अशा घटना घडल्या की, दुःख व्यक्त करीत आर्थिक मदत जाहीर करते. बस, त्यापलीकडे जाऊन ठोस कृती करीत नाही. त्यामुळे दरवर्षी या दुर्घटना घडत असतात आणि यापुढेही घडतच राहणार आहेत.
दरड कोसळून २२ मृत, ३४ जखमी तर घरे, इमारती दुर्घटनांत ३८२ मृत; १६२४ जखमी
मुंबईत २०१० ते २०२० या कालावधीत (२०१७ ची माहिती वगळून) म्हणजे गेल्या १० वर्षात मुंबईत दरड कोसळणाऱ्या विक्रोळी पार्कसाईट, घाटकोपर चिरागनगर, कुर्ला कसाईवाडा, खंडोबाची टेकडी, खैरानी रोड, कांजूरमार्ग, पवई, भांडुप, मुलुंड, वडाळा, चेंबूर, बोरिवली आदी भागात दरड कोसळण्याच्या १७८ दुर्घटना घडल्या आहेत. यामध्ये, २२ जणांचा मृत्यू झाला आहे तर ३४ जण जखमी झाले आहेत. त्याचप्रमाणे, गेल्या दहा वर्षातच घरे, इमारती व त्यांचे भाग कोसळण्याच्या ६ हजार ६०६ दुर्घटना घडल्या आहेत. त्यामध्ये ३८२ जणांचा मृत्यू झाला असून १ हजार ६२४ जण जखमी झाल्याचे वृत्त आहे.
दरड कोसळण्याच्या दुर्घटना
वर्ष दुर्घटना जखमी मृत
२०१० २६ ५ ३
२०११ १६ ८ १
२०१२ १२ २ १
२०१३ १० ६ ५
२०१४ ८ ० २
२०१५ ९ ७ १०
२०१६ २३ १ ०
२०१८ १३ ० ०
२०१९ ३३ ५ ०
२०२० १४ ० ०
एकूण १७८ ३४ २२
घरे, इमारती, भाग कोसळण्याच्या दुर्घटना
वर्ष दुर्घटना जखमी मृत
२०१० ५९३ १९७ ३९
२०११ ३७२ १०८ १३
२०१२ ३६७ १२९ १२
२०१३ ५३१ १८३ १०१
२०१४ ३४३ १०० २१
२०१५ ४१७ १२० १०
२०१६ ४८६ १७२ २४
२०१८ ६१९ ७९ १५
२०१९ १००३ २९९ ५७
२०२० ७०७ ७२ २४
एकूण ६,६०६ १,६२४ ३८२