मुंबईकरांचा एसी (वातानुकूलित) लोकलचा प्रवास आजपासून स्वस्त झाला आहे. एसी लोकलच्या तिकीट दरात गुरुवारी ५ मेपासून ५० टक्के कपात लागू करण्यात आली आहे. त्यामुळे उकाड्याने हैरान झालेल्या प्रवाशांना मोठा दिलासा मिळाला आहे.
केंद्रीय रेल्वे राज्यमंत्री रावसाहेब दानवे यांनी एसी लोकलचे तिकीट दर ५० टक्के करण्याची घोषणा २९ एप्रिलला केली होती. त्यानुसार तिकिट दरातील कपात आता लागू झाली आहे. त्यामुळे मुंबईकरांना गारेगार लोकलमधून प्रवास करता येणार आहे. याशिवाय विनावातानुकूलित लोकलच्या फर्स्ट क्लासचेही तिकिट दर कमी करण्यात आले आहेत. मात्र एसी लोकल आणि फर्स्ट क्लासच्या मासिक पास दरात बदल करण्यात आलेला नाही.
पहिली एसी लोकल डिसेंबर २०१७ मध्ये पश्चिम रेल्वेवर धावली. त्यानंतर सीएसएमटी ते कल्याण, बदलापूर, टिटवाळा आणि सीएसएमटी ते पनवेल, गोरेगाव हार्बर मार्गावरही एसी लोकल सुरू झाली. मात्र, तिकिट दर जास्त असल्याने प्रवाशांनी एसी लोकलकडे पाठ फिरवली होती. दर कमी करावेत अशी मागणी प्रवाशांकडून रेल्वे प्रशासनाकडे केली जात होती. अखेर या मागणीची दखल घेऊन एसी लोकलचा प्रवास स्वस्त केला आहे.
पश्चिम रेल्वे नवीन तिकीट दर
स्थानक्र वातानुकूलित लोकल विना वातानुकूलित लोकल फर्स्ट क्लास तिकीट
सध्या नवीन सध्या नवीन
चर्चगेट ते दादर ९० रुपये ५० रुपये ७० रुपये ४० रुपये
चर्चगेट ते अंधेरी १३५ ७० १०५ ६०
चर्चगेट ते बोरिवली १८० ९५ १४० ८५
चर्चगेट ते विरार २२० ११५ १७० १००
मध्य रेल्वेवरील नवीन तिकीट दर
स्थानक वातानुकूलित लोकल विना वातानुकूलित लोकल फर्स्ट क्लास तिकीट
सध्या नवीन सध्या नवीन
सीएसएमटी ते दादर ६५ रुपये ३५ ५० २५
सीएसएमटी ते घाटकोपर १३५ ७० १०५ ६०
सीएसएमटी ते ठाणे १८० ९५ १४० ८५
सीएसएमटी ते कल्याण २१० १०५ १६५ १००
सीएसएमटी ते बदलापूर २४० १२० १८५ १०५
सीएसएमटी ते टिटवाळा २२० ११५ १७० १०५
सीएसएमटी ते पनवेल २१० ११० १६५ १००
सीएसएमटी ते वाशी १८५ ९५ १४५ ९०
सीएसएमटी ते कुर्ला १३५ ७० १०५ ६०