IND vs AUS : ऑस्ट्रेलियाविरुद्ध रोहित शर्माचे विक्रमी ‘शतक’ 

भारताचा उपकर्णधार रोहित शर्माने ऑस्ट्रेलियाविरुद्ध तिसऱ्या कसोटीच्या पहिल्या डावात २६ धावांची खेळी केली. या खेळीदरम्यान त्याने नेथन लायनच्या गोलंदाजीवर षटकार लगावत अनोख्या विक्रमाला गवसणी घातली. ऑस्ट्रेलियाविरुद्ध क्रिकेटच्या तिन्ही प्रकारांत मिळून रोहितने १०० षटकार मारले असून ही कामगिरी करणारा तो जागतिक क्रिकेटमधील पहिलाच फलंदाज ठरला. रोहितने ऑस्ट्रेलियाविरुद्धचा पहिला षटकार २००७ टी-२० वर्ल्डकपच्या उपांत्य फेरीत नेथन ब्रेकनच्या गोलंदाजीवर मारला होता. आतापर्यंत रोहितने आंतरराष्ट्रीय क्रिकेटमध्ये ४२४ षटकार लगावले असून क्रिकेट इतिहासात सर्वाधिक षटकार मारणाऱ्या फलंदाजांच्या यादीत रोहित तिसऱ्या स्थानावर आहे.