राष्ट्रीय क्रीडा दिवसाचा प्रसार होणे आवश्यक

२९ ऑगस्ट हा दिवस ‘राष्ट्रीय क्रीडा दिवस’ म्हणून साजरा केला जातो. भारतीय खेळांचा अधिक प्रचार आणि प्रसार व्हावा हा या मागचा मुख्य उद्देश होता. पण अनेक लोकांना अजूनही या गोष्टीची माहिती नाही. या दिवशी विविध खेळांच्या स्पर्धा घेतल्या जातात. त्यातच हॉकीचे सामने जरा जास्त प्रमाणात होतात. यावर्षीही अनेक राज्यांत हॉकीच्या स्पर्धा भरवल्या गेल्या. मात्र, ते सामने पाहायला कोणीही नव्हते.

अनेक राज्यांत मोठया मुलांचे सामने होत असताना लॉरेन्स बिंग यांनी १० आणि १२ वर्षांखालील मुलांचे सामने भरवण्याचा निर्णय घेतला. हे सामने वांद्रे येथील सेंट स्टॅनिस्लास शाळेच्या मैदानात झाले. यामागे एकच उद्देश होता. तो म्हणजे २९ ऑगस्ट हा दिवस ‘राष्ट्रीय क्रीडा दिवस’ म्हणून साजरा केला जातो हे जास्तीत जास्त लोकांपर्यंत पोचवायचा. लहान मुलांचे सामने घेतले की त्यांच्यासोबत त्यांचे पालकही येतात. तसेच लहान मुले आपल्या मित्रांना या गोष्टीविषयी सांगतात. त्यामुळे या दिवसाची माहिती अधिकाधिक लोकांपर्यंत पोहोचते. मुख्य म्हणजे ‘ ग्रास रूट ‘ लेवलवर हा उपक्रम राबवल्याने लहान मुलांनाही या दिवसाचे महत्व कळण्यास मदत होते.