चिकन बिर्याणी, व्हेज बिर्याणी आपण नेहमीच आवडीने खातो. पण आज आम्ही मटण बिर्याणी कशी बनवायची हे सांगणार आहोत.
साहित्य :
- 1/2 किलो मटण
- 3 वाट्या बासमती तांदूळ
- आलं-लसूण पेस्ट
- मिरची
- कोथिंबीर
- 2 कांदे
- 2 टोमॅटो
- दही
- लिंबू
- तिखट
- मीठ
- हळद
- बिर्याणी मसाला
कृती :
- सर्वप्रथम मटण धुऊन त्याला आलं, लसूण, मिरची, कोथिंबिरीची जाडसर पेस्ट लावून त्यातच दही, लिंबू, बारीक चिरलेले टोमॅटो, तिखट, मीठ, हळद, बिर्याणी मसाला घालून एक तासभर ठेवावे.
- हे सगळे मिश्रण मुद्दाम डायरेक्ट कुकरमध्येच ठेवून द्यावे, कारण बिर्याणी कुकरमध्येच करायची आहे.
- तांदूळ धुऊन पंधरा मिनिट निथळत ठेवावे. त्यानंतर एका वेगळ्या पातेल्यात तांदूळ जेमतेम बुडतील एवढे पाणी घालून थोडा मोकळा भात शिजवून घ्यावा.
- कांदे उभे चिरून कढईत थोडे जास्त तेल घालून ब्राऊन रंगावर तळून घ्यावे. मग ते बाजूला एका पेपरवर काढून घ्यावे.
- त्याच तेलात हिंग, जिरे, लसूण (बारीक चिरलेली), हळद याची फोडणी करावी. ही फोडणी कुकरमध्ये ठेवलेल्या मिश्रणाला द्यावी.
- त्यानंतर त्यावर तळलेला कांदा पसरवून घ्यावा. त्याच्यावर मोकळा शिजवलेला भात पसरवून घ्यावा.
- यानंतर कुकरची शिट्टी काढून त्या ठिकाणी मळलेल्या कणकेचा गोळा लावून घ्यावा. झाकणालाही गोल कणीक लावून घ्यावी. कुकर मोठ्या गॅसवर ठेवावा.
- त्याचबरोबर दुसर्‍या शेगडीवर तवाही तापत ठेवावा. कुकर पंधरा-वीस मिनिटे गॅसवर ठेवल्यानंतर वाफ कणीक फोडून आपसूकच बाहेर येऊ लागते.
- ही वाफ बाहेर यायला लागली की कुकर गॅसवरून उतरून तापत असलेल्या तव्यावर ठेवावा. यानंतर गॅस बारीक करून अर्धा तास शिजू द्यावे.
- अर्ध्या तासाने गॅस बंद केल्यावरही पाच ते दहा मिनिटं वाफ मुरू द्यावी. यानंतर कुकर उघडून बिर्याणीचे लेअर्स तांदूळ न तोडता हलक्या हाताने ढवळून घ्यावेत.
हेही वाचा :