उन्हाळ्यामध्ये वर्षभरासाठी अनेक महिला पापड, कुरडया आणि लोणचे बनवतात. मात्र, हे लोणचे वर्षभरासाठी टिकवून ठेवणे कठीण असते. लोणच्याची साठवण योग्यरीत्या न केल्यास त्या लोणच्याला बुरशी देखील येते. मात्र काही वेळा या लोणच्याची साठवण कशी करावी? हा प्रश्न पडतो. परंतु योग्य काळजी घेतल्यास लोणचे वर्षभर उत्तम टिकून राहिल.
- Advertisement -
- लोणचे बनवताना सर्वप्रथम जी फळे आपण वापरणार आहोत ती फळे ताजी आणि स्वच्छ घ्यावी. मीठ हे प्रिझव्र्हेटिव्हज् असल्याने लोणच्यामध्ये अधिक प्रमाणात मीठ घालावे.
- ज्या बरणीमध्ये लोणचे भरणार आहात, ती बरणी स्वच्छ धुऊन घ्यावी. त्यानंतर ती बरणी तीन ते चार दिवस कडक उन्हात वाळवावी.
- लोणच्याच्या फोडी तयार करताना स्टीलच्या सुरीचा वापर करावा.
- लोणचे तयार करताना त्यामध्ये साखर आणि स्वच्छ गुळाचा वापर करावा.
- साखर घातलेली लोणचे मंद आचेवर गरम करुन घ्या. हे गरम केलेले लोणचे थंड झाल्यानंतर बरणीत भरा. यामुळे लोणचे खराब होणार नाही.
- तेल कडकडीत गरम करावे. मात्र, हे गरम तेल लोणच्याच्या फोडीत टाकताना ते थंड झाल्यावर टाकावे.
- लोणच्याची बरणी दमट आणि अंधाराच्या ठिकाणी ठेवू नये.
- लोणच्याची साठवण करताना प्लास्टिकच्या भांड्याचा वापर करु नये. लोणचे ठेवण्यासाठी काचेच्या किंवा चिनी मातीच्या भांड्याचा वापर करावा.
- उकळत्या पाण्याच्या वाफेवर बरणीचे तोंड करुन ते निर्जंतुक करुन घ्यावे.
- दररोज लागणारे लोणचे एका छोट्या काचेच्या बरणीत काढून घ्यावे. त्यामुळे साठवण करुन ठेवलेल्या बरणीत दररोज चमचा घालावा लागणार नाही यामुळे लोणच खराब देखील होणार नाही.